Büschemer Textschatz

Autoren und Texte

Im Textschatz werden die vorhandenen Büschemer Texte nach Autorinnen und Autoren gebündelt. Bei Josef Dürr und Bärthel siehst du zunächst nur Titel und kurze hochdeutsche Einordnungen; erst ein Klick blendet den Text ein. Bei Irmgard Wernher-Lippert kannst du zusätzlich die deutsche Parallelfassung aufklappen.

Josef Dürr 33 Gedichte Aus der Word-Fassung sauber neu aufgebaut und als aufklappbares Gedichtarchiv lesbar. Eberhard Bärthel 14 Texte Die wenigen vorliegenden Bärthel-Stücke als eigener Erinnerungs- und Humorblock. Irmgard Wernher-Lippert 2 Texte Büschemer Originaltexte mit der jeweils vorhandenen hochdeutschen Parallelfassung. Hugo Pahl 20 Texte Heimat-, Küchen- und Lausbubenstücke, die das Lebensgefühl von Büscheme tragen. Jürgen Wohlfarth 1 Texte Satirische Selbstbetrachtung des Büschemers mit Sprachwitz, Dorfphilosophie und viel Lokalstolz.

Josef Dürr

Die Gedichte stammen hier aus der saubereren Word-Fassung des Bandes. Der Text erscheint erst beim Klick auf den Titel, und innerhalb dieses Blocks bleibt immer nur ein Gedicht gleichzeitig geöffnet.

Gedichte 33

Erinnerungsgedicht über Winterabende, Nüsse, Geschichten und Kindheitsglück.

’s is lang scho her un scheint mer doch wie heut: Wenn als om Oowend in der Winderszeit
Zu Naacht war ’gässe, aanfoch, g’suund un gut Un no’ an Kloutz glejcht uff die Oufeglut,
Daß von der Kelt die glitzeride Blumme
Nit gaar sou hortli uff die Schweiwe kumme, Die jüngste G’wister war’n im Bettle scho’ – Dann war for uns ’es schönste Stünnle do.
Denn wem-mer sou bei’ nanner g’sätze n is, Hot als die Mudder Schleh’ un Hasselnüß Aus ihrem g’haame Säckle ausgepackt.
„Kin“, hot sie gsaacht, „do knebbert, beißt un knackt, Im Spötjohr hätt’r fleißi g’ropft un g’sücht,
Jetz fraabt euch jedi Hampfel, wu d’r kricht!“ Ah, des hot g’schmackt, des waar an Leckerbiß, Die dörre Schlehe un die Hasselnüß!
Un jedes hot dann öps zum Schaffe ’kriicht, A klaani Ärbt, wu baßt for’s Lambeliicht:
Do hot aans g’spunne, ’s anner fleißi’ g’strickt, ’es dritt’ an alde Wammest widder g’flickt,
Der Vadder hot mi’m Werkzeuch ’rümhandiert, Gebohrt un g’schnitzt, gebösselt un prowiert, Des Erbse g’lese, sell Kardoffel g’schejlt,
Un aa gebabbelt hot mer un verzejhlt.

Gar mannich’s hämmer g’hört von frühr’er Zeit Un Ernst’s un G’passi’s von koriose Leut,
Von Hexe aa un Geister manchi G’schicht
- Un manchi dicki Genshaut häm-mer ‚’kriicht
Un manchmool voller Engst nein’s Bett uns g’lejcht Un g’horcht, ob sich kann Geist vor’m Fenster rejcht. O Zeit voll Kinnerengst’ un goldnem Glück!
Voll Sehnsucht denk i jetz on diich zurück. Un wünsch gaar oft, i hör als klaaner Bu’
Bei Schleh’ und Nüß’ sou G’schichde widder zu. Do sell is rüm, die Juchend is vorbei,
Un’s Allder künnt, do hilft ka’ Hexerei. ’s Verzejhle is on uns, un ann’ri Kin San do un höre zu im Stüwwle drin.

Sou will i halt noch früh’rer Art un Weis’ Euch aa verzejhle jetz, bal’ Allts, bal’ Neu’s, Öps Ernst’s amool un G’späßli viel d’rzu, Sou haa i’s selwer gääre g’hört als Bu’.

Is mancher Reum aa hart un klingt nit schöön Un will Euch mancher Vers nit aus de Zehn: Beißt fest nar druff, ihr hätt a gsuund’s Gebiß!
‚’s san Dauwergrünner Schleh’ un Hasselnüß’!

Ein spielerischer Blick auf neue Technik und ihren Einzug in den Alltag.

Früher in der alde Zeit
Waar di Welt no nit sou weit, Denn zum Fluuch noch ouwe hiin Hot no gfählt der Zeppeliin.

Awwer wenn dr’s recht ermesst, Is doch manches schöner gwest Vor de Luftschiff mit Benzin
In der Zeit vor’m Zeppelin!

Host was früher höre brumme, Is es von’me Käf(f)er kummer Odder von’re Dreschmaschin’: Heut brummt aa der Zeppelin!

Als Buwe hot mer uns verschreckt, Un mit dem Bouzenickel g’neckt! Die klanste Kröut mit schlauer Mien’ Glaabt heut nor an de Zeppelin.

In England hot m’r sich bis jetzt
Vor Kriech un Einfäll sicher g’schätzt! Heut is dort der neuste Spleen
Die Invasion vom Zeppelin.

Früher hot beim Rendez-vous
A Platz g’langt, rings mit Buschwerk zu; Heut muß a noch Schutzdach hiin,
Dann sunst sieht’s der Zeppeliin.
Früher hot als der Poet
Gseufzt: Wenn iich nor Flüchel hätt! Heut schreibt aanfoch sie an ihn: Kumm halt mit’m Zeppelin!
Jetz werde bal’ zum eichne Flieche Die Föchel aa kaan Lust meh’ krieche;
Dann schwäbt halt üwwer’s Lendle hiin Der Klapperstorch per Zeppeliin

Dodrüm war’s halt früher schön, Trotzdem dass jetz Luftschiff gehn, Dann’s waaß heut ka’ Mensch: wuhiin Uns no brengt der Zeppeliin.

Kinderspiel und Krieg rücken unheimlich nah aneinander.

San aa verschiede sunst die Leut, Denkt doch on aans nar jeder heut:
Die Menner stenn im Schlachteg’wühl, Die Buuwe treiwe’s d’haam beim Spiel. Mit Sack un Pack, om G’wehr an Strauß, Marschiere sie zum Kampfplatz ‚naus; Om Waald – a Wüsting leit dernääwe – Do häwwe sie ihr Schützegrääwe.
Dort wehre sie sich gejche ’n Feind Un süche’n, wann er nit derscheint. Englender, Ruß’ Franzous’ un Särwe – A jedem dunn sie ‚’s Fell vergärwe, Ganz wie die Große. ’s is nar schad, Beim Spiele geht’s oft nit sou glatt,
Denn kaaner, wenn aa bloß zum Schein, Will uff der feindlich’ Seide sein.
Des geht’n gejche ehr und G’fühl, Un – jedem san die Hieb zu viel!
Kann Wunner drüm, daß’s Zoonk un Streit Bei jedem neue Spiele geit,
Bis sich die arme Kerle füüche
Un von de ann’re Prüchel krieche. – Blß ann’, den losse sie in Ruh:
Des is an stiller, blasser Bu’,
Der guckt sou ernst-verstenni’ her Als wenn er scho’ viel elder wär.
Der braucht sich üm kann’ Platz zu streide, Kempft immer uff der deutsche Seide.
Un frööchst, worüm? sou hörst von alle:
„Sein Vadder is in Frankreich g’falle“.

Frühjahr, Natur und Jugend werden hier sehr warm und hell erinnert.

’s lieb Frühjohr is jetz widder do, Mer spürt’s scho üwweroal,
Vom blaue Hiimel scheint die Sunn. Wie Gold uff Berch un Daal.

Un’s krawwelt, zawwel, wumer geht Om Raan un in der Hejch.
Kaa Wunner, dass im kalte Haus Kaa Mensch meh’ bleiwe möuch.

Ja, fort un naus die g’linde Lust, Wu alles lacht un singt.
Die eltste Fraa wärd widder jung, Un’s elt’ste Mennle springt.

Die wille Buuwe stecke jetz Von früh bis oowends drauß;
Die Maadli genn de Blümli nooch Un mache sich an Strauß.

Un annerscht hämmer’s aa nit g’macht, Mer häwwe Veieli g’ropft,
Die schönste Huppestengel g’sücht Un Pfeufe draus geklopft.

Des Huppemache waar halt schöön! Will sähe, ob’s no geht.
‚’s is gut, dass graad en Hollerbuusch Om Raan do drüwwe steht.

Der Zweich is räächt, do schneidst’n aa Un mejchst kringstrüm en Schniit; Mi’m Messer klöpfst un singst d’rzu ’es alde Huppelied.
Jetz sacht gedreebt, jetz is sie haus, Jetz no ‚’a Mundstück droon,
Un jetz gebloose – saprement! Geit des an helle Doon.

I bloos un bloos mejn Backe uff, Un’s Herz wärd froh und weit; Un mein Gedanke genn zerück Zur schöne Juchendzeit

Selt hot der Hiimel uff der Berch Die Erde no’ berührt.
Un glückli’ wie im Baredies Häm=mir a Lääwe g’führt.

Do waar der Daach sou loongk wie’s Johr, Die Haamet waar a Welt,
Wu alles doo is, was mer wünscht, Un was mer sicht, aam g’fellt.

Un’s Johr waar wie an Frühlingsdaach, Sou goldi, glückli, frei,
Die Blümli, ’s Bächle, ’s Mühleraad Sou uunbekannt un neu!
Sou neu wie selle Buuwe dort, Wuu on der Raan jetz genn, Un voller Staune, voller Frad Vor jedes Grääsle stenn.

Ja, Buuwe, ’s waar a schöni Zeit, Voll Fraad un voller Glück,
Un wann sie rüm is, brengt sie aam Kan Mensch meh’ sou zerück.

Ein kleines Tierstück über Jagdtrieb, Witz und Leichtigkeit.

Unner sellem Apfelbaam Piep-di-piep
Sitzt sou haanli un sou zahm un sou lieb
’s Schnäwwele gelb un’s Köpfle flink Froh an junger Disselfink.

Un es Kätzle luurt scho’ dort Wie an Dieb
Leckt sich’s Göschle aa und schnorrt: haa die lieb
Schleicht sich hasti durch die Wies, Maant scho’, ’s Finkle wär em gwiiß.

Awer’s Finkle merkt des gleich Mit der Lieb
Sitzt scho uff’m hökste Zweich: Kätzle, piep
Fang der doch an dumme Spatz, Finke san nix for a Katz!

	’s Röösle	(10.IV.13)

Do drüwwe aus’m Nochbershaus Guckt alli Früh a Köpfle ‘raus
I konn mein’ Bliick nit wenne.
Ihr G’sichtle is wie Milch un Blut, Un’s g’fellt mer, was sie sejcht un dut, Un wie ihr Füßli renne.
A Röösle steht im Garde drin,
Sie gißt’s un pfläächts mit frohen Sinn Un hüt’t’s als wie ihr Lääwe.
Un doch, wann sie als ’rüwwer sieht, Un liebli’ wie ihr Röösle blüht:
I glaab, sie dätt mers gääwe. Wart’ Gredele, in aller Früh
Kumm morche iich zum Gärdle nüü Du musst mr’s Röösle schenke.
Doch will i aa no’ diich derzu,
hätt sunst kann Friede un kaan Ruh, Müßt immer an di’ denke.

Dorf, Essen, Metzgerkunst und handfester Humor in einem langen Genrebild.

Sau, heut geht d’r’s on de Kraache, Un die letzte Stun is doo
Drauß – om Houf steht Butt’ un Schraache, Douwe köcht ’es Wasser scho’.

On die Ärbt un g’schafft Un nit ’rumgegafft!
Butzt de Hackkloutz, schlafft die Messer, Brennhoulz bei, wie mehr, wie besser!

A halbs Johr häm=mer uuverdrosse Besorcht des Dierle spööt un früh, Un häwwe’s on nix fähle losse, Om Futter nit un on der Müh.
An alder Wohrspruuch laut’t, an gudder
- Un den befolch i immer g’nau - :
Wie reinlicher die Pflääch un’s Fudder, Wie größer geit’s emool a Sau.

Awweil is der Metzger kumme Brengt em schnell de Kaffee ’rein! Lauder Bohne häm=mer g’numme Un vom best’ Zigoori ’nei:

Do sann aa die Weck, Waarm un friisch vom Beck.
Greift fest zu und lotzt’s Euch schmacke, ’s geit heut wacker Flaasch ze hacke!
Den Grundsaatz däff=mer nit vergesse, Der gilt for jetz un alli Zeit:
Wer schaffe söll, muß düchdi’ esse,
’s nütz kaam nix, wenn er Hunger leid’t. Richti’ gesse, richti’ g’schafft,
Des mejcht froh un geit aam Kraft! Sou, jetz konn es G’schäft beginne, Ziecht die Buzzel aus’em Staal!
Deixel, muß mer doo sich schinne, Heut is schärr die Düür zu schmaal. Gel’, des is a Stück,
Schnaggelfett un dick!
Houl emool en Striick do hinne, Daß mer an die Woond sie binne!

Loß braat un weit’ es Houfdoor offe Zum gucke for die Nochbersleut
Un wer künnt durch die Gasse g’loffe, Söll sehe, dass mer schlachde heut.
Öps schöns däff jeder Mensch betrachde, Do schlisst mer nit die Hausdüür zu,
När dort, wu’s nit viel geit zum Schlachde, Is haamli’s Hinne’rüm-geduu!

Un nochert krieche alli Freund
Un Nochbersleut aus unsrer Küche An Haaf=voll Kreddelsubbe heint Un Wörscht a Bäärle zum Versüche!

Leit die Buzzel uff’m Schraache, Is des nit a prächti’s Biilde?
G’schaabt, gebutzt, wie g’leckt ze saache, Un a Farb, so rosich=miild!

Scho’ uff hunnert Schritt Kriecht mer Appetit!
Rüssel, Schwenzle, Ohre, Füßli Gäwwe lauder Leckerbißli!

Und sou geht’s masten aa im Lääwe! Mer däff halt nix uff’s Aeuß’re gääwe, Im Inn’re steckt der rechte Wert.
A mancher greift ganz bös dernääwe, Wu’s Klaad un’s schöne G’siicht begäährt. Un statt ’re rechde Fraa zum Schaffe Kriecht er an faule Modi Affe.

Kreddelflaasch künnt scho’ zum Schneide, Messer, Bridder, Schüssel her!
Hunger braucht mer kaan ze lede, Un der Weinkruuch werd nit leer. Is 'es Flaasch sou zaart!
's is a guddi Aart!
Eßt, was jeder konn vertraache,
's blei't no gnuuch for'n Schwardemache!

So Hausg'machts g'hört zum Allerbeste, Nix Schönners geit's uff dere Welt!

Mer tut sein Säule selwer meste
Un schlachde, wies' aam baßt un g'fellt. Do is es Flaasch halt appetitli!
Un in de Wörscht kan Lumbezeuch, For'n Beudel is es aa profitli',
Mer hot öps gud's un fühlt sich reich.
Die Kammern hangt voll Schwardemaache, Voll Rippebroode, Schunke, Wörscht,
Do kommer achle, beiße, naache,
Mer künnt sich vor als wie an Förscht. Un dampft der Krauthaaf in der Küche, Hei, dut des appetitli riche!
Dann's beste, offe g'saacht un laut,
Is g'räuchert's Flaasch mit Sauerkraut.

Duut's jetz nein die Mulde schüüde, Straabt's mit Pfeffer, reibt Muschkaat, Spaart die Zwüwwel nit,
Des mejcht Appetit! Dann's allerbeste Esse
Schmackt nit, hot mer's G'wörz vergesse.

Des Metzelg'schäft des muß aam g'falle, Un's Worschtle is a schöni Kuunst;
Der Metzger is begehrt von alle
Un steht bei alt und jung in Guunst. Nit när im Worschtle is er g'schickt -
s' geit viel no, wu em graad sou glückt. Fählt öps der Sau, der Kuh, der Gaaß Der Metzger sieht's, der Metzger waaß's; Dut aans an böse Finger krieche,
Un hilft kan anners Mittel meh' -
Der Metzger lejcht öps druff zum Zieche, Dann dut'r morche nimmi weh!
Un wenn er on der Mulde sitzt,
A G'schicht verzejhlt un lacht verschmitzt Un leckt sein Finger zum Versüche
Füllt Wuurscht uff Wuurscht un steicht un bind't, Un trinkt vum Wein a Schlückle g'schwind!
Ja, konn's öps gääwe uff der Welt, Wu aam sou gut wie's Metzle g'fellt?

Dunn die Wörscht im Kesse sume, Is die Sau uff Stücker g'hackt,

Ein großes Stuben- und Spukgedicht für lange Winterabende.

Wenn's Fääld im Schnee begraawe leit Un's Käunzle von der Dächer schreit, Un haamli's G'wölk om Himmle ziecht Un g'vespert wärd beim Demmerliicht, Do bleit mer gääre d'haam im Haus Un rucht von Ärbt un Plooch sich aus. Wie jeder doo sein Stuwwe löubt,
Wenn drauß' der Schneewiind heult un döübt, Im Schlot wenn's klappert, klerrt un brummt, Im Oufe 's Feuer singt un summt,
Un leis' un haamli wie an Geist
An Schein uff Wen' un Boude schmeißt. Do werde Strümpf un Henschich g'strickt Un Löcher g'stopft un House g'flickt;
Die Mudder brengt a Hampfel Nüß' Un dörri Quätschich, zuckersüß', Un weist de Maadli bei der Ärbt, Wie nix vergröt't un nix verderbt.
Der Vadder schnitzt und klöpft un pflächt Un bösselt Neu's un Alt's zerecht,
Denkt on die Ärbt im alde Johr Un nemmt sich viel for's neue vor,
Mejcht Wied und Bind't un wickelt Stroh; Un kringstrüm stennd die Buuwe do,
Die helfe'm odder gucke zu Un häwwe ka Minudde Ruh.
Horch! Aweil geht die Haudüür uff, Do künnt der Waaldschützpeter 'ruff! Der Hot 'n Baart, a großi Pfeufe, Dr'zu an lohme Aarm, an steufe.
Der konn verzejhle und waaß Sache, Ganz ernsti un zum Bucklitlache.
Der Waald, des is sein Heilichdum, Kennt alli Pfäädli, graad un krumm, A jedes Plätzle, jeden Baam,
Un gengt am li(e)bste nimmi haam; Un was er drauß uff Schriit un Triit Bei seine Geng als hört un sieht
Un unerdaachs sich üwwerlejcht, Un annr'e gääre saache möücht, 'Do red't er oowends als d'rvoon Un fengt von dem un sellem oon:

Wie hoch die junge Dennli senn Un wu die dickste Achbaam stenn; Vom G'maanraat un von Boledik, Wer förschi künnt un wer zurück; Bis wan die Säu wär'n groß un fett Un ob der Scheck bal' kalwee dätt.
Drauß döübt der Stuurm un schüddelt's Fenster Un heult im Schlot wie Hölleg'spenster.
Un manchmol scheint's ganz leis un weit Wie wenn öps winselt, heult un schreit Uff ihrem warme Benkle dort
Do sitzt die Baas, un's Spinnraad schnoort. Die waaß, was Wiind und Sturm bedeut't! Advent, des is die Geisterzeit;
Jetz genn sie üm, in Haus und Fääld Un büße, was sie häwwe g'fäählt.
Un gnaukt d'rzu bei jedem Wort,
Un's Räädle danzt uns spinnt un schnorrt. A jedes rückt de Stuhl un horcht
Un lacht un dut, als hätt's kann Forcht. Si'st, Baas, wie alles luurt un baßt?
Verzehl doch, was d'for G'schichtli waßt! - Un sie verzejlt von alder Zeit,
Von gudde un von böse Leut,
Von Kriech un von vergraaw'ne Schätz Un von verwünschde Geisterplätz; Loondschieder, wu jetz feuri' genn
- Die Ruude brennt in ihre Henn - Wal sie amool for sündhaft Gääld
Schlecht g'mässe häwwe Wies' un' Fääld; Vom Wille Heer, wu ewich ziecht
Un durch die Welt wie Sturmwiind fliecht, Un mit sich nemmt for alli Zeit,
Wer's hört un nit schnell onni leit.
Un zwüsche=m Naacht= und Morcheläude Dun durch die Luft die Hexe reide;
Als Hund, als Katz, in jeder Gstaalt Verüüwe sie ihr bösi G'waalt:
Sie zöpfe'm Gaul im Staal de Schwoonz, Verdrücke Ende, Huun un Goons
Un sitze'm Mensche uff die Bruust Un peiniche'n voll Deufelsluust.
Un sou verzejhlt sie fort un fort, 'es Räädle kerrt, die Spuule sorrt;

Die Kinn, die sitze still un blaß,
Kaans von 'en denkt meh' on en G'spaß. Der Sepp ziecht uff die Boonk sein Füß', Wal's unne=drun sou dunkel is;
Un's Ma<riele sieht vor=em Fenster Scho' hexe, Geister, Hölleg'spenster! -
"Horch", sejcht die Baas, horch! hört'r nit,
Wie's Käunzle schreit: "Kumm mit, Kumm mit?" A Zeiche, daß's in korzer Zeit
An Sterbfall in der Gasse geit.
Wem gilt's Do is es Roode schwäär - Schärr mann=i, daß iich's selwer wär."
- Der Waaldschütz gnauckt: Baas, sicher is's: Ihr laaft uff Eure letzte Füß'!
Dann fengt er lufdi' oon ze lache: "Mein, Baas, hört uff mit dene Sache Un glaabt mer nit on soddi Bosse, Wu Euch nit ruhich schloffe losse!
Euch konn a jeder prophezeie:
Ihr hört no' lang 'es Käunzle schreie Unn lääbt, - do bin i gut d'rfor - Ganz sicher Euer hunnert Johr!
Wenn immer, wann zur Oowendszeit Beim Haamwääch mir 'es Käunzle schreit, Der Dood an meiner Düür dätt klopfe, Könnt i scho' lang kan Pfeuf meh' stopfe."

Der Vadder lacht: "Gel', 's alde Lied: Wu d' onne ge(h)st, muß's Pfeufle miit! Wenn des d'r niinmi schmackt un g'fellt, Bist nimmi lang uff dere Welt.
Des, muß=i saache, g'fellt mer jetzt, Daß d' heint emool sou krefdi red'st Un mit der Baas a weni' zankst, Sunst sterbt sie no' vor lauder Angst. Jetz trinke mr do_druff e Glaas
's gut for uns un for die Baas.
Kinn, ge(h)t nein's Bett, 's is zeit for Euch, Un babbelt nit, un schlofft mer gleich!"
O je - die gucke engstli' her Sie ziddere un heule schärr.
Do peckt der Waaldschütz aans om Zoupf, "Zieht halt die Bettdeck üwwer'n Koupf; Dann steck=er waarm un sicher drin;

Gutgmacht, un bet't un schlofft gut, Kinn!" Sie genn voll Engst zur STuwwe 'naus,
Horch, wischbert's nit im Eere d(r)auß? Der Sturmwiind is's, der wrd nit müd
Un singt unheult sein Geisterlied -
Un leit mer dann im Schloof un Traam, Vom Wille Heer verzejhlt er aam, Mejcht lewwedi die Geisterg'stalde
Un brengt die Zeit zerück,d ie alte. Des rauscht im Ohr un klingt im Sinn Un läädt un wääbt im Herze d(r)in.
Un weider klingt's un weider hallt's, Aan G'schlecht verzejhlt's am ann're als, Wenns Fääld im Schnee begraawe leit Un's Käunzle von de Dächer schreit.

Ein Feld- und Kindheitsgedicht voller Bewegung, Licht und Arbeit.

Mer genn 'naus's Fääld! - Hei, wie des klingt, Wie do vor Fraad der Fritzle springt!
'naus's Fääld, wu üwwers weide Land sich hoch de blaue Hiimel spannt, Wu jedes Plätzle lockt un lacht
In Frühjohrssunn und Frühjohrspracht; wu Schmetterling' vom Hiimel flieche Un weißi Wolke drouwe zieche,
Wu aus der Lu(u)ft die Lerche trillert, Un aus 'em Daal 'es Bächle schillert, Wu üwwerm Klee die Käffer brummer, Die Bienli üm die Blüüde summe,
Im Graas Heihöpfer lusti' springe Un Haamerli versteckelt singe, Wu's Mäusle aus sei'm Löchle spitzt Un in der Forcht 'es Hääsle sitzt, Der Bauer mit der Beitsche knallt
Daß's d'(r)üwwe'm Waaldeck wiiderhallt, Wu fleißi' sich a jedes rejcht
Un emsi' schafft, bis 's vieri schlejcht -
	Dann künnt es allerschönst' un best: Mer setzt sich 'noo'n un achelt fest Unn gönnt de müüde Glieder Ruh Un babbelt un verzejhlt d'zu.
Kriecht awwer's Büüwle Langiweil, Hui, springt's drwon in aller Eil
Un setzt sich drüwwe an die Raan Röpft schöni Blumme, sücht sich Staan, Guckt, wie die flike Eemes(t) laafe,
Un fleißi' for de Winder schaffe. Betracht't die Käffer un die Schnäcke Un ringelt sich an schöne Stäcke.
Un formt un ballt aus gelwem Lahme Die allerschönste Sache z'samme.
Wenn dann die Sunn zum Waald sich neicht Un's letztmool durch die Danne leucht't Zum Feieroowend noh un weit
Bal' do, bal' dort a Glocke läut't, - Dann geht 'es Fritzle still un Zahm Mi'm Vadder un der Mudder haam.
Wie schmackt=em do sein Milch un Brot!

Gel', des mejcht Backe dick un rot
Un geit en Schloof, so g'suund - i wett' - Findst kann im wäächste Grafebett!
	Bist müüd un schlöffri', Büüwle, heint? Schloff, bis die Sunn durch's Fenster scheint! Un traamst, sou si'hst 'es Fääld ganz g'wiiß Voll Engeli - als Baredies!

Ein kurzes humoristisches Stück um Hochzeit und Missverständnis.

Der Dooni wär mit seiner Braut, Der Gredel, heut vom Pfarr getraut. Hot jedes aa sein Fehler zwaar,
So geit's doch g'wiiß a glückli(ch)s Paar. Sein linke Baan is a weni' schwer,
Un sie a bisle hart von G'hör. Doch g'wiiß is, wer on alles denkt, Daß er's zu nix im Lääwe brengt.
	Jetz seid nar still und spitzt 'es Ohr!
Der Pfarr nemmt 's Buuch un liest drau vor: Die Hauptsach in 're rechte'n Eh'
Wär treui Lieb in Glück und Weh. Dann frööcht er 'n Dooni, ob dann er Zum Heire fest entschlosse wär? "Ja", sejcht der Dooni laut un fest
(Die Frooch wär gaar nit nöödi gwäst). Jetz künnt die Gredel: ob sie dann
De Dooni nehm zu ihrem Mann?
Kaan Antwort ... Dann sie hot's nit g'hört! Der arme Dooni, ganz verstört,
Hust't zärscht un stumpt sie nein die Hüft' Un guckt sie oon un gnaukt un rüft.
"Er hot gfroocht, ob d' mi nemme däst?" Do schreit die Gredel graad sou fest
Em Dooni nein sein Ohr: "Ha joo! Destwääche semmer jo graad doo!"

Kinnerwuunsch

Dr Vadder nemmt sein Buu uff's Knie Un blinzelt zu der Mudder nüü:
Non, Peter jetz sejchst mer schnell, Was willst, daß i der kaafe söll?
Saach, ob di' do mit fraawe däst Wan d' no' an klaane Bruder häst?
Was schüddelst dann de Koupf sou schnell? A Schwesterle hä'st liwwer, gäl?
"Wenn's gleich is", sejcht der Deixelsbuu' Un lacht mi'm ganze Gsiicht derzu,
Un pfiffi' spitzt er's klaane Maul - "Nocht wär mer's libst an Schockelgaul."

Ein Mundart-Witz über Rausch, Hof, Schwein und falsche Wahrnehmung.

Der Naazi geht vom Wärtshaus haam Mit schwäre Schritt un halb im Traam - Im Zickzack is er g'loffe.
Er zieht im Houf sich langsam aus,
Er maant, er wär' scho' drin im Haus - und lejcht sich noon zum Schloffe.
Do künnt 'e'bei di Butzelsau,
Die kennt de' Naaz am Schriit ganz g'nau, Un schmatzt und grunzt vertrauli'.
Sie kibbert (schnuffert: im handschr. Original) an sei'm Wetterhut, Doch schmackt der alde Filz nit gut,
Is zäh un unverdauli.
Em Naaz künnt des Gebrumm am Ohr Zwaar ganz bekannt im Dusel vor - Un konn's doch nit verstehne!
"Fraa", sejcht er, spaar der heit die Müh' "Un saach dein Preddich morche früh, Dann wärd's scho' besser gehne"!

Ein komisches Verwechslungsgedicht rund um Krankheit und Arztbesuch.

"Hör Hannes" sejcht die Bärwel matt Heut is mer's Uffstehn ganz verladt,
Im link' Baan reit's un brennt's wie Kouhle, 's is's best, du dust der Dokter houle."
Do is der Hannes euch verschrocke! Es fehrt wie's G'witter nein die Socke, Ziecht House, Schdiffel, Kiddel oon
Un mejcht sich nein die Staadt d'rnoon. Gottlob, bis jetz war johrelongk
Ka' Mensch un Vieh im Haushalt kroonk. Hot aans emool an g'schwollne Haals, Sou reibt mer'n ein mit Budderschmaalz, Un hot e Sau kaan Appetit,
So schlacht't mer sie un doktert nit.
	Uff aanmool fellt'm ein ganz haaß, Daß er jo's Doktershaus nit waaß.
Doch dut'n des it weiter plooche, Was mer nit waß lößt sich derfrooche
Un denkt: laafft durch die Hauptstraß' graad. Un richti', noch 're klaane Weil
Steht off'me Zettel von Email,
Daß do an Doktor Streitmann wohnt, Im zwatte Stock, zur rechte Hoond. Do denkt der Hannes, geh i nein!
Der Dokter sitzt beim Gläsle Wein Un guckt sou schaarpf de Haanes oon, Dem wärd's ganz angstebang d'rvoon, Un's Frooche fellt em werkli schwer: "I will zum Dokter, san Sie der?" "Jawohl, Doktor der Rechte Mann!
Un nun führt Euern Fall mir an!" Der Hannes kratzt sich hinnerm Ohr: Herr Dokter, i konn nix derfoor,
'S is nix mit Ihne, 's dut mer leid, Mein Fraa hot's uff der linke Seit."

Traum und Alltag geraten hier in ein kurzes, überraschendes Spiel.

Schär alli Johr, sou lang mer's denkt, Do kriech i sou a Nüüt,
'S ist mastens üm die Hundsdääch rüm - Do wärd i hundskrach müüd.
Do hilft kann Bulver und kan Schnaps Kan Bille und kan Tee;
Der Dokter sejcht, 's keem von der Hitz, Wi iich, hätt' es no mehr'.
Do is 'es beste Mittel: Schloof! Knaps sn die Baan im Bett,
Schlöft scho der Koupf un schnacrcht un säächt Mim Säächbouck um di Wett.
Sou schloffi neulich aa 'mol ein Un haa zebal an Traam:
'S wär Kärwemuusich, un i wär Drbei im "grüne Baam".
Der dick Fritz und der lange Schorsch Mit Geiche un Kla'nett,
Die spiele sunst an Schuh ze dief, Heut spiele sie ganz nett.

Un's Mariele is aa d'rbei, A Maadle, sapperlott!
Was des a Gsichtle un Statur Un a baar Aache hot!
Kan Wunner, daß des schöne G'sicht Die Musigande rührt:
Der dicke Fritz, der lange Schorsch, Die spiele euch wie g'schmiert!
Un danze dun=mer rümundüm Es Marile un iich,
Un endli gäw ich ihr an Kuß, Un sie küßt haamli miich.
Do wach' i uff un hör' a G'sing Un spür an Stiich im Gsicht:
Der Deufel houl doch sou an Traam, Wu amm a Schocke sticht.

Die ärschde Sparchel.

Adje, Frau Maier, wisse Sie, I haa heut weni Zeit,
I muß bei meiner Kundschaft 'rüm, 's san schärr zwaa Dutzend Leut.
A Böttin hot ka' gudi Dääch, Viel G'laaf un großi Müh'.
	Was richt denn aus der Küche sou? Ah, Sparchel koche Sie?
Nan, Sparchel san mein Leibspeis nit; I haa vun annmoool g'nuuch.
Daß Sparchel Leckerbisse wär'n, Is lauter Luuch un Truuch.
Also, vor zwaa Johr traach i scho' Mein Eier noon zu's Schmitt's,
	s waar graad on Daach sou schöö wie heut Un förchterlichi Hitz.
Die Schmittin süch die Eier raus Zwaahunnert odder mehr,

Trost, Vorsicht und Lebensnähe stehen hier im Mittelpunkt.

"Da, Franz, do schneidst der Brotlaab oon, Un jedem geist a Stück d'rvoon!"
Sou sejcht die Mudder voller Eil Un richt't zum Koche sich derweil. Bei sou öps is der Franz nit daab, Er nemmt es Messer un de Laab,
Setz oon un denkt bei sich: i schneid, Daß 's lauder großi Stücker geit.
Sechs Gschwisterli stenn üm=en rüm, Un jedes mit 're Bettelstimm.
Ersch sächent mer's, dann schneid't mers oon, Nocht hot der Bös kan' Oondaal droon!
"Daß d' do=drüm" sejcht der Franz, "sou zankst! Do haa i wärkli gaar kan Angst!
Bis des der Teufel heut derfehrt, Is unser Laab scho' lang verzehrt!"

Familienstolz wird hier zugleich ernst und augenzwinkernd betrachtet.

Heut werd, wie jedes fümfte Johr, 'es Volk gezejhlt mit Haut un Hoor. Do künnt an Moon nein jedes Haus
Un frööcht nochjedem Drääck aam aus: Wie d'haßt, wann, wud' gebore bist?
Als Jüd, als Heid, Dörk oder Christ? Ob d' mennli, weibli, leddi bist?
- Un was er sunst no gääre wißt! Sou künnt er aa zum Hannes naus, Der prüchel graad sein Buuwe raus.

Ein humorvolles Kneipen- oder Wirtshaussujet mit doppelter Sicht.

Am Feieroowend nemmt der Schmied Sein' Märtle als nein's Wertshaus miit. Wann halt an Schoppe vor aam steht, Do werd mer lusti', 's Mundstück geht; Es fell aam leichter zu belehre,
Un's is aa besser zuzehöre.
"Waßt, Märtle", fengt der Vadder oon, "Sou vier, fünf Glaas, do leit nix droon: Es Feuer hitzt, der Bloosbaal'ch ziecht,
Kan Wunner, wem=mer Duurscht do kriecht. Is truckit, un verstaabt der Schluunk,
Do hilft nix, wie an gudder Truunk. Nar mach, daß d nie a Räuschle kri'st,
Trink nit ze viel, wenn d' dorschdi bist!" 'em Märtle geht die Lehr ze Herze,
Nar aan, des sieht mer, mejcht em Schmerze, Do waaß er sich kan' recht Root:
"On wellem Zeiche merk mer's dann, Wenn mer zu viel getrunke hot?"
Do blööst der Schmied de Schaum ewegg: "Si(h)'st die zwaa Menner dort im Eck?
Sou long die zwaa nit doppelt sist, Sou waßt, daß d' nit besoffe bist!" "Ja, Vadder, sejcht der Märtle druff, I mach ganz g'wiiß mein Aaache uff Un guck de ganze Oowed noon: Dort sitzt jo nar an aanz'cher Moon!"

Zum Pläsir!

Spazier i'mool zum Städtle naus, Do höri' vor'em letzte Haus
A mords Geklopf, a höllisch's G'schraa; I luur un guck un säh a Fraa,
Die hot an Stäcke in er Hoond
Un haabt, als hätt sie kann Verschtoond, In aam fort uff en arme Buu'
Un weddert, schreit und gilft d'rzu. Mich dau'rt zeletzt des arme Blut,
- Wer selwer 'kricht hot, waaß, wie's dut! - Un kuurz besunne geht i noon:
"Si häwwe scheint's an böse Buu! Was hot der Schlingle dann geduun?" Do guckt sie wüüdi' zummer her: "Mir g'hört er nit, der Bengel, der! "Der is aus Mannem un bei mir
När drei, vier Wuche zum Pläsier!"

Jugend, erstes Werben und ein wenig Liebeskomik.

I g'hör von jeher zu de Kalde,
Wu Lieb' for großi Dummheit halde. Sou Bosse koste Zeit und Gääld,
Der Koupf wärd waarm un's Herz gequält.

Der Markt erscheint als Ereignisraum, auf den die folgenden Stücke zulaufen.

Im Herbst, wenn's uff Micheli geht, Die liewe Sunn scho' diefer steht, Do sann die Dauwergrünner froh. Der Künichhöufer Mark' is do!
Dort find't mer alles z'sammeg'stellt Aus jedem Eck un En' der Welt; Un's kumme Leut von üwweraal, Von Werde bis uff Merchedaal.
Denn do geit's dausend schöni Sache Un viel zum Gucke un zum Lache:
Kummeedi, Reitschul, Stenn zum Schisse, Un Stenn mit feini Leckerbisse;
Un Muusich, heisa hopsasa!
Un die, wu's könne, danze=n=aa. Un hot mer Herz unn Sinn dergötzt,
Meld't sich der Maach zugudderletzt; Gaarküche sann a Masse dort,
Do köcht's un brotzelt's alsefort. Wer dorschdi is un Hunger spürt, Werd schnell un billich do kuriert; Un wal's drin lusdi' is un schöön, Besinnt sich kaaner neinzegehn.
Do treffe sich von noh un weit Die Freund un die bekannte Leut; Verzejhle, plausche, wun're, lache Un höre hunnert neui Sache.
Un wenn sie ausenanner genn, Dann drücke sie sich fest die Henn': "Gel, wenn's halt nimmi seine söllt', Daß miir uns säh uff dere Welt, Sou werde-mer doch hoffe däffe, G'wiiß in Kün's'oufe uns zu treffe!"

Die Fahrt zum Markt als lebendiges, dichtes Dorfbild.

"Ev", saach-i 'letzt zu meiner Fraa, "Uff Künichs'oufe gem=mer aa,
Mein Houseträächer sann scho' schelcht, Der Küüwel rinnt un is derlecht,
Mein Sunndaachshut ist nimmi viel, Un brauch' an neue Beitschestiel; Om aane Stiefel bohrt der Zeh,
Kan Suhle hejbt, kan Rister mehn!"

Sejcht mein Evche voller Fraad: "Ich bräucht' aa e wüllis Klaad, Faaderolle, Bender, Spitze, Futterstoff un Bääselitze,
'm Fritzle for sein fleißi's Schaffe, Wöllemer a Muusich kaffe;
U i maan, mer nemme'n miit, Daß er von der Welt öps sieht."

Wie mehr kumme naus die Bahn Steht do schärr die halwe G'mann, Menner, Weiwer, Borsch' un Maadli: All mit Hüüt un Sunndaachsklaadli, Korze Ärmel, lange Ärm Hendschich, Brosch un Sunneschärm. Wenn die wölle all nein 'n Zuuch, Hot er g'wiiß ni Wääche g'nuuch!
Uffgebaßt, jetz fehrt er 'rein! Dunnerkeil, wer's do aam eng, Schärr verschdickt mer im Gedreng! Üüwerlaafe dunn die Aache,
Wal sie Stinkadores raache; Tritt geit's uff die Zehespitze,
Awwer närchends Platz zum Sitze. Immer völler werd der Zuuch,
Un scho' lang sann's haufeg'nuuch. Wu's a klans Statiönle geit, Kumme widder frischi Leut.
- Endli' hilt's. Gottlob un Doonk! Alles is scho' halwer kroonk. 'Raus steicht jeder voller Fraad, Bloß 'em Fritzle is es laad; Trauri' bleit er no'mool stehn:

"Vadder, des waar adder schön!"

Ein großer Rundgang durch Geräusche, Waren und Treiben des Marktes.

Is mer durch Kün's'oufe g'loffe, Steht der Mark do, frei un offe.
Stoond on Stoond, un großer Truuwel, Hendlersg'schraa un Kinnerjuuwel.
Werkli', do muß ['s] Herz aam lache, Sieht mer all die die schöne Sache: Bücher, Bilder und Kalenner, Hääfe, Kraut- und Bohnestenner, Oonsichtskarde, Briefbabier,
Saffe, Schuhwichs, Waacheschmier, Ünnerhouse, Zipfelkappe,
Stiffel un Säälbennelschlappe, Wolle, Seide, Gaare, Zwiire Un Läbkuche von Walldüre; Waffel, Bisquit un Makrone, Zeppelin' un Luftballone, Zuckerstange un Scho'klaad, Bääredrääk un Hoorbumaad, Schnuppdewak un Zigaredde, Goldni Ring un Uhrekedde,
Messer, Hemmer, Beil un Zange, Kupferdroht un Messingstange, Sense, Gawwel, Schoore, Reche, Gläser, Krüüch, wu nit verbreche, Strick un Rieme, wie von Eise, Wu in Ewichkeit nit reiße.
Kuurz un gut, i gää mein Wort: Alles sieht un kriecht mer dort. Doch i will kaan Zeit verliere, Alles euch zu expleziere,
Denn do hätt-er nix devonn: Guckt's euch liewer selwer oon!

Ein Marktschreier-Porträt voller Rhythmus, Lärm und Witz.

Der größte Lärm mejcht jedes Johr Der Jakom mit de roode Hoor.
Wie üm de Stoond sich alles drengt -
Schär mannt mer, do werd Gold verschenkt. Un alles hot er, was=mer braucht,
Wu weni' kost't unnit viel daucht.

Hört, ihr Leut, un üwwerlejcht, Was der rood Jakob sejcht:
"Kafft bei miir! Ihr macht a G'schäft, Wal der's närchends besser trefft.
Euch zulieb, ihr Leute, bedenkt, Is heut alles halwer g'schenkt. For an Mark a Dutzend Sache, Un sölt a meinG'schäft verkrache: Messer mit'm Diamant
- Garandiert 'es best' im Land - Blei, Nodizbuuch, Fedderhalder, Brille mit Fuddraal for's Alder, Briefkuwert un Sichellack, Fleckewasser for de Frack, Elfdens no' a Biild als Zier,
Un zum zwölfde: Briefbabier; Besser is kaans uffzutreiwe,
Könnt druff on der Kaiser schreiwe! Werd i aa machulle nuu,
Gewwi no' öps gut's derzu: Doo im Glaas des Trenkle drin is for Großi un for Kin'
Hilft for Maache, Lunge, Herz, Leibweh haalt's und Seeleschmerz; For a jeden baßt's von euch, Denn's laxiert und stopft zugleich. Jösses, was bin iich sou dumm,
Schrei mi' haaser, schaff mi' krumm, Duu kan' Pfenni' profediere
Un mei eichen's Gääld verliere Werd bankrott un bin no' froh - Nuu, der Jakob is halt so!
Morche duut mein G'schäft verkrache
- Heut for'n Mark a Dutzend Sache!

Mer lääwe in 're lausiche Zeit,
Drüm kafft euch Kemm, ihr liewi Leut! Fahrt nit ohni Koomb zerück,
Fufzich Pfenni Stück for Stück, Enge, weidi, grooß un klaan, Silber, Gold un Elfebaan, Fufzig Pfenni', liewi Leut!
's sann die allerletzde heut!

Houseträächer müßt=er kafe! Könnt doch nit e=sou rümlaafe, Nejchel euch nein Buckel schlaache Un do droon die House traache!

Kafft euch warmi Dücher, Leut, For die böse Winderzeit!
Wann die kalde Dääch oofange Un on eurer Naase hange Zapfe wie die Hopfestange, Wann die Ohre san derfröört,
Denkt=er: 's waar halt doch verkehrt; Hätt'i uff de Jakob g'hört!"

Eine humoristische Folge von Jahrmarkts- und Schaustellerbildern.

Weltwunner ware's, find't mer g'schriewe, Im ganze Altertum bloß siewe.

Alltägliches Kaufen wird zum kleinen Volksstück.

Miir g'hör'n gottlob zu dene Leut', Wu aa öps kaffe, wenn's öps geit, Un nemme uns a jedes Johr
A Last for Künnichs'oufe vor;
Doch was mer endli' haam als brengt, Is immer mehr, als wie mer denkt.

Denn wem=mer durch die Gasse laaft Un maant, mer hätt jetz' alles 'kaaft
- Der Beutel is scho' leicht un dünn, - Künnt doch no' mannichs aam nein'n Sinn: A Beitsche ohne Schmaaß is nix,
For Schuh un Stiffel braucht mer Wichs, Un wal mer graad Schuhbennel sieht, Nemmt me a Päckle von en miit.
Mein Ev' braucht for ihr Klaad aa Knöpf, Hoornoodel steckt sie nein ihr Zöpf,
Un zu' me rechde Sunndaachsstaat G'hört aa a weeni Hoorbumaad.
Un wemmer's ganz Johr sich schind't Sou hot mer's, denk i, aa verdient, Daß aans bei sou're G'läächenheit
A G'schenk, a schönns, am annre geit: Drüm kriecht die Ev a Brosch von mir, Un iich an Pfeufekoupf von ihr.
Zu sein're Muusich gäm=mer 'm Fritz A dicki Stange von Lakritz!
Am Liesle mejcht die größde Fraad A Bobbe mit eine schöne Klaad!
For'n Peter werd a Gäule 'kaaft, Wu lusti uff vier Räder laaft.
Der alt' Großvadder raacht no' fest: A Päckle Knaster is do 's best!
Was kafft mer for die Nochber'n ein? Schoklaad wrd der 'es libste sein; Den konn sie zülle ohne Zehn,
Do werd er scho' allan vergehn! Läbkuche jetz no' von Walldüre,
De Kin' dehaam 's Mäule miit zu schmiere, For alli Fäll' a Duttvoll Tee -
Dann glaawi, fäählt ganz g'wiiß nix meh.' 's Gääld is fort, der Beutel läär,

Von lauder Päck der Buckel schwäär, Die Hen' un alli Dasche voul:
Jetz, Künnichshöüfer Mark, leb wouhl!

Ein warmes Besuchsbild mit Backofen, Plätz und Gastfreundschaft.

Die alde Bas in Künnichs(h)oufe Beckt lauder Gudd's in ihrem Oufe; Doch was i's maste von er schätz, Des san ihr guddi Quätschichblätz: Ganz mörb un dünn, un dick belejcht,
Graad wie's aam schmackt un wie mer's möücht. Un wenn amool der Maach' aam zwickt,
Dann brengt sie in der Buddel glei' An gudde Quätschichschnaaps 'e'bei. Drüm, wemmer widder haamzu genn, Vom Kaffe müüd un hungri' senn,
Un häwwe g'hört un g'sähe g'nuuch,
Geht's zu der Baas no zum Besuuch
"Wie geht's Euch, Baas?" "O, gut souweit; Mer wärd halt elder mit der Zeit."
"Un Euch fäählt nix, des sieht mer jo, Ei, un sou groß der Fritzle scho'!"
Un freundli, wie sie immer waar, Un emsi' laaft sie herr=e=daar:
"Jetz', setzt euch z'hamme on de Diisch Un greift fest zu, der Blaatz is friisch; Spaart nit om Kaffee, 's is no' drauß - Gel, Ev, der wärmt von inne raus!" Dann werd verzejhlt un g'lacht un g'red't Un alsefort zum Esse g'nöt't;
Der Fritzle stöpft un achelt nein - Sou söllt's halt jeden Sunndaach sein!
Un wem=mer mant, mer wär ärscht kumme, Haßt's widder fort un Abschied g'numme. "Baas, 's is jetz höksti Zeit zum Zuuch!"
- "Ja, hätt'r dann aa g'gässe g'nuuch? Do haa i Euch a Päckle g'richt't,
Im Fall d'r haamzu Hunger kricht." Un wie mer sich aa widdersetzt -
Mer nemmt halt's Päckle doch zuletzt. "Adee, Baas, ummer danke schön,
Blei't g'suund und loßt's räächt gut Euch gehn! Vergeßt's nit, und besücht uns bal'!"
	" 's is räächt. Un ihr, in jedem Fall, Kummt's anner Johr halt widder ruff!"
	Räächt gääre, Baas, verloßt Euch druff!"

Die Heimfahrt bündelt Müdigkeit, Freude und Markterinnerung.

Wenn vom Lärme drauß' der Welt 's Hiire summt un's Ohr aam schellt Un der Mensch verlangt noch Ruh, Treibt's en halt der Haamet zu.

Müüd un lommeri mejcht aam aa
's Markgetrieb unn Hendlersg'schraa, Un mer is von Herze froh,
Is der Oowend endli' doo.

G'sehe hot mer viel un g'hört Un an Haufe Gääld verzehrt,
G'handelt, 'kaaft und Päckli g'schlaft, G'faulenzt - un doch müüd sich g'schafft.

Wie om Daach, so is aa jetzt Dicke-dick der Zuuch besetzt, Un es muß no' ouwedrein Was a jeder 'kaaft hot, 'nein.

Unne, ouwe, überaal
Päck un Schachtel ohne Zahl; Vor de Aache flattre Fohne Fliecherli un Luftballone.

Nein die Ohre schißt's un knallt's, Pfeuft's un trummelt's, blööst's un hallt's, Heule Kin' un zanke Leut
Mit der größde G'mütlichkeit.

Mit de annre üm die Wett Schreit der Fritzle un drumbet't, Bis er schlöffri's Mäule sperrt. Un uff aamool ruhich werd.

Aa der Jörch, trotz allem Lärm, Schlöfft un lahnt sich uff sein Schärm, Bis 's Vergnüüche is zu En'
Un mer in der Haarmet sen.

Hei, is des a Fraad im Haus, Peckt mer all die Sache aus!

Undie froher G'sichter heut, Wem=mer jedem 's Markstück geit!

Lejcht mer endli' sich zur Ruh Un mehcht müd die Aache zu, Sieht mer no' imTraam zuletzt, Was aan unnderdaachs dergötzt.
Muusich, G'wehr un Trummelklang Fraabt die Kinn' no wuchelang;
Un is endli nix mehr' doo, Blei't doch die Erinn'ring no'.

Drüm, des is halt gwiiß un wohr: Sou an Mark' a jedes Johr
Wie der Künnichsöüfer, gelt, Geits nar aamool in der Welt!

Eine lokale Sagenballade mit Frevel, Strafe und Wiedergänger.

Im Kriech, do geht's halt gottlos her: I glaab, dreihunnert Johr san's schärr, Do wa'rn die Schwede üwweraal
Un häwwe aa im Dauwerdaal
Die Leut gepeinicht, 's Land verheert, Die Städt' geplünnert un zerstört, Kapelle, Kärche aagebrennt
Un Kreuz' un frommi Bilder g'schennt. Un mannich's Stückle werd no' heut Verzejhlt aus sellre böse Zeit.

Bei Desselhause reit'n Schwed, Wu jetz no' die Kapelle steht,
- Em heilche Wolfgang is' sie g'weiht, Un's kennt sie jeder noh un weit -
Die Dür steht uff, der Reiter hilt Un sieht a Muttgeottesbild,
Wu mild und freundli' vorne steht.
Do plööcht der Deufel unsern Schwed, Er zieht sein' lange Saawel raus
Un höült voll Wut zum Schlaache=n=aus. Jetz, denkt 'r, is der Koupf scho' hunne!
Doch's biild hot blooß om Haals a Wunne. Beim zwadde Hieb, des waaß er gwiiß, Do leit der Koupf vor seine Füß;
Mit alle Krefde schlejcht'r zu.
Wie's Blut do spretzt! Un wie im Nu An Koupf schwer uff die Erde höpft! - Sich selwer hot der Schwed geköpft! Schwer is der Frevel g'strofft un g'rächt Un seither reit't in dunkle Nächt'
Üm die Kapelle, in dem G'wenn,
Der schwed mi'm Koupf in seine Hen'. Uff weißem Schimmel künnt'r g'riide Un hot kan Ruh un find't kan' Friede, Wal Reu wie Feuer in=em brennt.
Der "Schimmelisreiter" werd'r g'nennt.

Eine geisterhafte Schatzgeschichte mit Versuchung und Scheitern.

Sou spöt a Liicht? Un was rührt un rejcht
Sich drunne im Keller, wenn's Middernaacht schlejcht? Was huscht dann an Schaddem bal' do, bal' dort?
Un der Moon un die Fraa, die rejde kan Wort? Was grejbt er a Louch on der Mauer 'naa'?
- Sie wölle de Schaatz, de goldene, haa', Wu unnerm Boude vergraawe leit,
Un jetz muß er kumme, denn jetz is sein Zeit. Scho' dreimool hot'r'n im Traam sich gezeicht: Jetz wesse sie, daß er noch ouwe steicht.
Wem's Glück do lacht, wer fromm is un bet't Un fließi' grejbt un kan Wort d'rbei red't - Dem fellt der goldene Reichdum zu;
Drüm sn sie sou still un schaffe in Ruh. Un klopft'n aa 's Herz, sie rejde kan Wort.
Un graawe un schwitze un graawe sou fort. Do knerscht öps Hart's! a eiserni Kiste!
Jetz haßt's de Deufel üwwerliste;
Jetz könne sie aus de Klaue vom Böse Den arme, ruh'lose Geist derlöse,
Wu früher des Gold vergraawe hot. Er find't sein Ruh nit noch'm Dood,
Bis widder der Schaatz aus der Errde künnt, - Dann is die Seel zur Erlösing bestimmt.

Eine Ortssage über Hilfe aus der Not und späte Erlösung.

Scho' mancher is sou glückli' g'wääst
Un hot'n arme Geist derlöst Un hot die ruhlos' Seel befreit
Von langer Pein un Leidenszeit.

An Bauer hot mit Waach' un Vieh
- er hot nit g'weßt, worüm und wie - De Wääch im Finstre nimmi g'funne Un is nei'n n diefe Graawe 'kumme. Sou laut, as wie er rüfft und schreit, Kan Antwort künnt von noh un weit. Schwaarz is die Naacht un spöt die Uhr Un niemest meh' im ganze Flur.
Doch wie er steht in hökster Not, Do sieht'r drüwwe feurit=rot
An Lichtschein aus der anre Welt, Wu alles üm sich rüm derellt.
Voll Angst, verzweifelt, rüfft'r'm zu: "Wenn niemest hilft, sou hilf m'r du!"
Da! guck! Schnell wie der Blitz steht scho' Der feurit Moon om Grawe do
Un leucht't bei Naacht un Finsternis, Bis Vieh un Fuhr in Ordning ist.
Dann sejcht der Bau'r voll Dankbarkeit: "Du host mi' aus der Not befreit,
Un jetz sejchst mir d'rfoor, wi du Zum Friede kumme konnst un Ruh!"
	Wenn d'uff der Acker," sejcht der Geist, "Von dem d'rnäwe Errde schmeißt,
Drei Schipp voll Errde g'hauft un fest,
	Die haa i früher un'g'recht g'nummer, Drüm muß i immer widder kumme - Dann bin i frei un bin derlöst!"

Der Bauer hot erfüllt des Wort,
Un gliech war's G'spenst for immer fort; Seit dere Zeit hot kaaner meh'
On sellem Platz a Feuer g'seh.

Krieg, Arbeit und Dreschbild werden hier kämpferisch zusammengeschoben.

Des war a krefdi's Kaiserwort,
Durch's ganze deutsche Reich klingt's fort: "Die wölle=mer verdresche!"
Von Oste künnt der russisch Bär Vom Weste die Franzouse her, Des Völkerchor, des freche.
Von England d(r)üwwe künnt der dritt Un denkt: do geits for miich Profit, Der Michel muß alt bleche!"

Nar staat un langsam, Räuwerpack! Euch wärd der Michel, - tick=ti=tack!" - De Buckel bal' verdresche!
Un guck! Scho rejcht sich's üweraal In alle deutsche Lenner
Von Schlösser, Hüdde, Berch un Daal Versammle sie sich ohni Zaal
Die starke, freie Menner
Un richde sich zum Dresche

Wenn haaß die Sunn aa brennt un glüht, Un Door' und Dissel steche -
Vorwärts! 's wärd kaaner von uns müde, Des könne=mer verspreche!
Schmeißt hoch die Garwe uff die Waach, Hurra! un führt sie unner Daach

Landwirtschaft und Versorgung erscheinen als patriotisches Gegenbild zum Feind.

Un schwört der Feind uns aa de Dood Un wünscht uns Pest un Hungersnot Un schlißt uns neidi' kringstrüm ein - Miir könne drüüwer ruhich sein.

Die deutsche Erde is no' frei,
Un's find't de Wääch zu uns der Mai; Von kaa'm Franzous' un Russe wärd Der liewe Sunn' die Grenz versperrt.

Uff jedem Acker, jedem Raan
Un is 'es Plätzle no' so klaan -
Steht friisch und grüün die junge Soot Un reift, will's Gott, zu Fruucht un Brot.

Un san' im Land nit Baure g'nuuch, Stellt sich die Bäurin nein der Pfluuch Un reut't un zackert, setzt un seebt
Un sorcht un schafft un schneid't un meebt.

Un schimmert dann wie Gold der Flur Un füllt die Scheure Fuhr uff Fuhr, Dann falde=mer voll Dank die Hen': Gottlob, jetz hot die Sorch an En'!

Gottlob, mer könne ruchich sein, Der Feind schliß ümesunst uns ein Un schwört uns ümesonst de Dood: Mer häwwe 's liewe deutsche Brot!

Ein kriegszeitliches Stück mit starkem regionalem Selbstbewusstsein.

Miir war'n zu alle Zeide friedli',
Miir Dauwergrünner Leut un g'mütli'; Miir losse jedem, was=em g'hört,
Un wer's verdient, wärd von uns g'ehrt. Dick san die Nerve, g'suund der Mache, Miir könne g'wiiß e Last vertraache,
Es dauert lang un g'schieht nit leicht, Daß uns amool die Galle steicht.
Doch wenn sie steicht, - a Dunnerwedder! - Dann sem=mer zäh wie Houseleder,
Dann steicht sie hochun köcht und wühlt Un wärd so schnell nit aagekühlt.

Sou is es uns aa neuli' 'gange,
Wu's haßt: Sie wölle Kriech oonfange Von alle Seide, Ost und West - Worüm? hot kaaner von uns g'weßt! Nit g'weßt? O doch, ihr Lüüchebrut! Lüücht und verstellt euch no' so gut, Mer wisse's doch: 's i's euer Neid,
Daß's deutsche Land sou schön gedeiht! Des is, was euch scho' lang nit g'fellt.
Herr wöllt'r seine von der Welt, Miir söllte diene euch als Knäächt Nar Pflichte haawe un ka Räächt!

Was emsi' miir uns spöt und früh derspraare dun mit saurer Müh, Was unser deutschi Baurekraft,
Was Handwerk un Fawrik uns schafft: Wal ihr's for euch nit haawe könt, Drüm doubt'r sou un wüt't un schennt, Drüm packt'r uns von alle Seide
Un strebt dernoch, uns auszureude. Vergungre sölle Fraa und Kin,
Des wär noch euerm Mördersinn! -

Gottlob, es is no nit souweit
Un g'schieht sou weni' sunst wie heut. Wöllt ihr uns nit es Lääwe gönne, Gut! lernt-er uns jetz annerscht kenne!

Deutschland hilt z'samme wie an Moon, Un's "Hinnerland" is vorndedron:
Miir weise euch, wie fest un g'suund Wechst Prüchelhoulz im Dauwergruund! Druff, druff! Der ganze Welt gezeicht, Wie's ist, wenn uns die Galle steicht!

Militäralltag wird hier teils komisch, teils stolz gebrochen erzählt.

Hurra! der Vadder is Rekrut Un in=ere Kaserne;
Dort muß er jetz de ganze Daach Viel Neu's zum Allde lerne.

Er g'hört nit zu de Jüngste meh' Mit fünfeverzich Jöhrli,
Un uff'm Koupf un in seim Baart Findst manchi graui Höhrli.

In seine Brief' do schreibt er uns Als ganz koriosi Sache,
Un wann i denk: der Vadder is's, Do muß i nix wie lache.

Am fünfi müsse sie scho' raus Aus ihe Strohsaakbedder; Wenn sich no' aaner dehne will, Geit's gleich a Dunnerwedder.

Dann stehter im Kasernehouf Un lößt sich kummediere,
Muß dreewe sich noch rechts un links, Stillstehne un marschiere.

Schritt' mache lernt er wie an Kiind Un wie a Lohmer 's Gehne
Muß wie an Storch uffs recht Baan Un dann uff's linke stehne.

Un mache muß er selwer's Bett, Muß wichse, börschte, schrubbe, Un schejlt geduldi schüsselweis Kardoffel for die Subbe.

Sein Eßg'schärr spült'r jedesmool Mit eichne Hen om Brunne,
Mit Kisselstaan is do im Nu 's letzt' Dibbele verschwunne.

Wenn's dann om Oowend neuni schlechcht, Blöst pünktli' dr Drumbedder.

Dann schlupfe sie wie klaani Kin Brav widder nein ihr Bedder.

Om g'sunne Schloof do fehlt's=em=nit, No' wennicher om Hunger
Un singe dut'r uff'm Marsch Sou lusti' wie an Junger.

Doch wenn er alles konn un waaß, Is's aus mi'm Exerziere,
Dann däff er zu seim Regiment Noch Rußland nein marschiere.

Dort dut er mit'em Hindeburg An Haufe Russe fange.
Im Laacher uff'm Büchelbärch Dut gwiiß der Platz no' lange.

Hot awwer endli 's deutsche Heer De letzte Siech errunge,
Dann kumme sie zurückmarschiert, Die Allde und die Junge.

Dann sehe=mer de Vadder stramm Marschiere in der Reihe;
Hei, wiem'r dann vor Fraad und Stoulz Miir Buuwe "Hurra" schreie!

Noch't schke mer'm an Sorchestuhl, An recht bequeme, gudde:
Drin muß er uns verzeihle, bis Miir selwer sen' Rekrudde!

Ein direktes Kriegsbild aus dem Unterstand, rau und unerquicklich.

Bums-vallra! Im Feindesland Hocke mer im Unnerstand! Vierezwanzich Tritt genn 'raa, Wenn i mi' verzejhlt nit haa. Unne brennt a Kärzeliicht, Daß mer öps zu sähe kriecht.
Schwerenot und Dunnerwedder! Stühl san do un disch un Bedder - Bedder? Guck, die nemlich' Sorde Hämmer d'haam als Öpfelhorde, Üww'r ananner immer zwaa, Unne eng un ouwe aa!
Landsmann, mein, des is a G'nuß, Wem=mer do=drin schloffe muß! Un an Oufe, schön, bequem, Steht do hinne außerdem.
Glaab m'r's, mit d'r Zeit künnt's aam G'mütli vor un schärr wie d' haam! Denn zur Kurzweil häwwe miir
A no' allerhand Gedier: Üwweralli jückt's un krawwelt's,
Höpft's un rennt's un zwickt's un zawwelt's. Doch, wem is de no' öps Neu's?
's san ganz zahmi Flöh und Läus. Hörst des knuppre am Dunister, Des Gepfeuf un des Geknister? Guck, do laaft's - 's is bloß a maus, Ja, wer mejcht sich do öps draus! Un wenn's halt a Radde wär -
s' kümmert g'wiiß uns aa nit mehr. unser Äußer's baßt ganz g'nau
Zu dem schöne Dachsebau:
's G'si(i)cht voll Stupfel, 's Hoor verzaust, Daß'm Deufel selwer graust,
Stiffel, House, Rouck verschliert, Un die Hen' voll Lahme g'schmiert, Steuf die Knie und steuf 'es Gnick Vom Gebück un vom Gedrück.
Wie mer do bei'nanner leit, Manst des wär a Klaanichkeit? Aanzli dreewe is verwehrt,
's haßt: die ganz Abteilung kehrt!

- Doch Geduld! 's mejcht alles nix, Hauptsach is: er kriecht sein Wichs! Wer kriecht Wichs? Der Tommy Bull, Wu on allem trejcht die Schull.
Wärd's uns h'inn amool zu eng Und zu dumm in dem Gedreng,
Braucht's vom Hauptmann nar an Wink, Un mer störme friisch un flink
Nuff un naus! Wie's Wille Heer Geht's dann üwwern Tommy her. Dunnerblitz! Druff!! Hüo - hüpp! Tommy, dann geit's deutschi Hib!

Ein spätes Stück über Heimatlaut und Nähe in der Fremde.

Gestern san die Neue 'kumme Aus der Garnision, Durchenanner aldi, jungi, Vadder schärr un Sohn.

Manchem is es unbehaachli' Kennt sich no' nit aus;
An'ri warn scho' Summer, Winder Zwaa= un dreimool drauß'.

Manchi san vom Schwarzwaald drouwe Die vom Bodesee,
Der is aus'm Schwowelendle, Seller von der Spree.

Wenn sie rejde, wenn sie frööche Des un mancherlei,
Red't m'r miit un is mi'm Herze Doch nit ganz d'rbei.

Do uff aanmool muß i horch: Dorther klingt vertraut Unner dene viele Laute
Aa an Haametlaut.

Grüß di' Gott, Kumraad und Landsmann! Bist m'r scho' bekannt:
Brengst m'r in der Haametsprooch jo Grüß' vom Haametland!

Worterklärungen zu Josef Dürr, Schlehe un Hasselnüss' - Gschichtli un Gedichtli aus'm Taubergrund, 1919
Stand: 29.03.2015

Hinweis: Otto Heilig hat seine erläuternden Anmerkungen als Fussnoten angeordnet. In der 2. Auflage von 1951 wurde diese Anmerkungen ihres Fussnotendaseins beraubt und alphabetisch geordnet. Von Unbekannt. Ich erweitere die Heilig'schen Anmerkungen zu einer alphabetischen Folge, um eine Vergleichbarkeit der unterschiedlichen Schreibweisen zu erhalten. Deklination / Konjugation werden teilweise erweiterter als im Original dargestellt. In der 2. Auflage wurde leider auf die Deklination / Konjugation einzelner Wörter verzichtet.

a - kleine aa - auch aa - ab

Eberhard Bärthel

Die Texte von Eberhard Bärthel liegen uns bislang nur in der Büschemer Fassung vor. Auch hier werden die Stücke erst nach Klick auf den Titel sichtbar, damit die Seite lesbar bleibt.

Texte 14

Ein rückblickendes Generationenstück über Nachkriegszeit, Lebenswandel und den langen Blick auf das eigene Leben.

wu vorm zwadde Weltkriech gebore sin*
Mr konns nit glaawe - doch des is wohr -,
s sin weit üwwer sechzich Johr,
seit mir sin uff die Welt kumme.
Woas hot die Welt for n Wandl gnumme
in däre Zeit, seit mir gebore!
Woas hämmer gwunne , woas hämmer verlore?
Es hot koan Fernsäher gäwe un aa koa Pille,
koa Schluckimpfung, Kuchelschreiwer un Gleitsichtbrille,
koa Atom- un aa koa Solarkraftwerke,
koa Anabolika un gedopdi Musklstärke.
Mr hot nit gekennt des Penicillin,
un bis zr Mondlandung woars ewig no hie(n).
Zu unserer Zeit woarn BUNNIES koa Hoase
un Käffer koa Volkswäche uff de Stroße.
Aa hot s koa Waschmaschin un Gschärrspüler gäwe,
z erscht hämmer gheiert, dann därfte mr zammeläwe.
Mr sin uff dr Gasse scho rümgrennt,
wu koaner no hot n TEENAGER gekennt.


Die Maadli poussiere - des woar koa Froach(e),
doch Kerli häwwe koa Ring in de Ohre getroache.
Is mr mit oanere mool länger gange,
des woar wie verlobbt, schnell woar mr gfange!
Un hot mr sej JA-Wort dann emool gäwe,
nochd woar mr verheiert fors ganze Läwe.
Haüt zejlt nor no oans, nämli FUN un aa SEX,
woars groad no dej Fraa, is sie jetz scho dej EX.
Innere PATCHWORK-Familje hört mr Eltern scho mool soache:
mej Kinn un dej Kinn häwwe unser Kinn verschloache.
Nome woarn fremm uns sou wie die:
KIDS un TEENS un AZUBI.
Mir woarn halt Kinn, Maadli un Buwe,
un Stifte in dr Lehrlingsstuwwe.
Mir woarn scho lang vor all dem doo,
wie Emanze, Aussteicher un eme Hausmoo,
vor PAMPERS, COMPUTER un LAST MINUTE-Flüche,
un eme Kinnererziehungsjohr, des die Männer krieche,
vor WALKMAN, HANDY un Sunnestudio,
Satellite-Empfang un Transistor-Radio.
ROCK woar bei uns no e Klaaderstück
for Maadli un Fraue- un koa Muusich.
"Die" BAND in koam Rechtschreibdude stand,
mir häwwe glernt no: "der" un "das" Band.

Es hot koa künstlichi Herze gäwe,
un fremm woarn Wörter in unserm Läwe
wie SOFTWARE für alles, woas mr nit oolange konn
beim COMPUTER, im INTERNET - un aa dann
NONFOOD for alles, woas mr nit trinkt un nit isst,
häwwe McDONALD’S nit gekennt, drüm a nit vermisst.
Wer hot scho gwisst, woas e PIZZA is,
BIG BROTHER un en Fernsehquiz?
Mr häwwe e Eis no fore Fünferle gschlotzt,
un im Zirkus Liliputaner un Neecher oageglotzt.
Mr häwwe koa SNOW- un koa SKATEBOARDS gekennt,
sin aa nit gejogged, mir sin halt grennt.
Sin durchs Land gezouche mim Woache die Laüt,
hot mr Scheureborzler sie ghasse – nit CAMPER, wie haüt.
Mir ghörn no zu dene, die sou dumm woarn zu glaawe,
e Fraa mussn Moo erscht emool gheiert hoawe,
un dann erscht konn se krieche e Kiend.
Wie die Oosichde haüt doch verännert sin!
Fast alles hämmer selwer no gmoacht,
Un koaner hot je im Schlof droo gedoocht,
dass dr Stoat den stützt un aa no hejbt,
der üwwer sej ejchni Verhältnisse hot gläbt.
Mir häwwe fleißich glernt, gschafft un gspoart,
un dann erscht gekaaft - des woar unser Oart.

Ob BOCK mr häwwe, hot uns koaner gfroocht,
mir häwwe des gmoacht, woas dr Massder hot gsoacht.
Mir häwwe uffm Abbord unser Gschäft verricht’t,
doch Babier von dr Rolle, des hotte mr nit.
Nochdem mr studiert un gläse hot
die FN* un aa des Lioba-Blatt**,
hots gäwe defür no en annere Nutze,
mr konnt de Hinnere sich dmit butze.
Doch naüi Zeite sin üwwer uns kumme,
viel hot sich üwwerläbt, viel hämmer gwunne.
Die Statistik sejcht, dass gsünder mir haüt
als all die vor uns häwwe gläbt, die Laüt.
Vielleicht is groad doofür Grund un Beweis
unser altmodischi Oasicht un Läwensweis.
Is aa die Fassade scho e bissle verwiddert,
und s Gsiecht wie Dörrequetschich durch Runzl verkniddert,
sou simmer im Herze doch jung no gebliewe,
wenn schwächer aa werde die Liewestriewe.
Woas s Läwe no brengt - wer konn des scho wisse?
Sou viel is gwieß: koan Doach möcht mr misse
von all denne, die mr häwwe glücklich verbroacht,
von de annere werd gschwieche un nix dozu gsoacht.

Ein Nachkriegs- und Sprachwitz mit amerikanischem Missverständnis.

Wie fünfevärzich üwweroall
Woarn Amis aa im Dauwerdoal.
Woarn ejquartiert in unserm Städtle,
gut uffgebasst, ihr junge Mädle!
Die Lina von der Gardestroß,
die schort un hackt un recht druff los,
denn Obst un Gmüs vom eichne Garde,
ergänzt die Läwensmittl-Karte.
Wem von aüch denkt denn no haüt
noch m Kriech die schwere Zeit?
Mr konnt nix kaafe for sej Gäld
von all dem woas m meiste fählt:
Koa Milch un Flaasch, koa Fett un Brot,
an all dem woar recht großi Not.
Rationiert woarn selli Doache
Läwensmittl, Ooziehsache.
Un forn ganze Monet dann
krisst fuffzich oder hunnert Gramm
groad emool uff dejne Karte:
Mr wär verhungert ohne Garde!
Drum hotn jeder oogebaut
Obst un Gmüs, Zoaloat un Kraut.


Die Lina spatzt nej in ihr Hänn, muß no en Haufe schaffe;
En Ami lehnt am Gardedor un dut e bissle gaffe.
"You have a hard time pretty girl" hört mr de Ami soache,
denn wie er voller Mitleid sieht, dut sich die Lina plooche.
Der werd mr doch, denkt sie sich druff, koan uzüchtche Ootroach moache,
Un söll mr bleiwe jo eweg mit soddne dumme Sache.
Wer hot scho domools Englisch gkönnt?
Mr hot verständigt sich mit Hänn(d)
un Füss un Brogge, die mr uffgschnappt.
Drum hot aa die Verständigung oft emool nit geklappt.
"Du hard time", fröcht r, "nix verstehn?"
Sie moant, söllt mit noch Horrde* gehn(e).
Die Lina wärd fuchsdeufelswild,
woas soun Kerl wohl ej sich bild ́t.
Voller Zoore schwenkt sie ihr Hagge
un sejcht: "Nix Horrde*, - Horrde uff die Bagge".

Ein Schulstück über Namen, Einschulung und kindlichen Eigensinn.

Wie alli Johr zur gleiche Zeit
Wern ejgschult aa widder haüt
Maadli, Buwe, alli Kinn,
die groad emool sechs Johr gworde sin.
Der Lehrer sejcht: Setzt euch mool noo,
mir fange mit woas Leichdem oo.
En jeder laut sejn Nome nennt,
dass jeder jeden Nome kennt.
Wie hasst n du, mit der rote Kapp?
"Hannes", sejchter Bu räächt knapp.
Hört zu, ihr Kinner, merkt euch gut,
"JOhannes" er richtig haße dut.
Un du mi(t)-m uffgschloachene Kinn,
wie hasst n du? "Ich bin der Achim".
Halt, un no mool uffgebasst,
der Bu "JOachim" richtig hasst.
En kloaner Kerl, räächt uffgeweckt,
sitzt noachdenkli do hinnem Eck.
Sejn Blick is uff de Lehrer gricht ́t,
die Bagge glühn im kloane Gsicht.
Dass r jetz drookünnt - er scho luurt,
steht uff un sejcht: "Ich haß JO-Kurt".

Ein pointierter Schulwitz über Hochsprache und Dialektblick.

Der Lehrer Kies ist sehr erpicht,
dass in der Schul’ man Hochdeutsch spricht.
Die Kinder mühen sich zwar sehr,
doch aller Anfang, der ist schwer.
Soeben hat er sie belehrt,
dass Pilze zwar sind sehr begehrt,
wie: Steinpilz, Stockschwamm, Parasol ,
der Pfifferling und Champignon.
"Giftpilze aber müsst ihr meiden
und lernen sie zu unterscheiden."
"Wie sieht ein Pilz aus?", möcht ́ er hör ́n.
"Ich waß, Herr Lehrer: wie n Schärm".
"Wie sagt man richtig?", wüßt’ er gern.
Do sejchter Bu: "Wie n Rächeschärm".

Ein Erinnerungsstück an Lausbubenzeit, Streiche und Dorfjugend.

Wasst no, hört mr manch oan froache,
Erinnerst di no an selli Doache,
wu mir unser Kinner- un Juchendzeit
- die Büschemer Sproch verröts no haüt -
verbroacht häwwe im schönne Frangeland,
gspassi aa "Badisch Sibirje" gna(e)nnt?
Wasst no, wie mr Räuwer un Schandl häwwe gspielt,
un rümgrennt sin durch die Gässli wie wild,
uffn Höhbärch, de Spraat, die Lorenzekabell(e),
beim Bauer Berwerich durch de Houf un die Ställ?
Häwwe mim Küchesieb annere Bohnestange
Molche drauß m Salamander-See gfange.
Woas hämmer do unser Lehrer geploocht,
un dumms Zeuch zum Riese Valdin gsoacht?
Häwwe beim Schrejner Stolz rümgegafft
un em Schlotfecher die Ladder weggschafft.
Ball jeder hot jeden beim Nome gekennt,
oanzelni sogoar mim Spitznome gnennt.
Ob Lumbe, ob Knoche, Alteise, Babier,
en Fünfer, n Zehner krisst allemool defür
von oam, der uffkaaft woass nimmeh ganz,
em "Hoase-Fritz" un em "Hoase-Franz".
Host zwaa mool gsähe e Kinner-Chaise schiewe,
die oane hinkt hüwwe, die annere hinkt drüwwe,
die host glei gekennt, un jedem woar kloar,
dass des die "Neunevärzich-fuffzich" woar.
Üwwerhaupt hots viel Laüt mit Gebreche no gäwe,
e Schinnerei woar for die s ganze Läwe.
Die oane hotn kinnskoupfgroße Kroupf,
der annere Grützbeutl wie Öpfel am Koupf.
Die "Kupfergluck" selig, die hot e Boar Boa(n),
die krümmer no als Dörgesäwel woar(n).
Die Amis sin kumme, dr Kriech woar jetz aus,
mir organisierte uff Daüfel kumm raus,
ob Lejöl vom Boanhouf, ob Kersche vom Boam,
gstibitzt hämmer manches, un gschleppt hämmers hoam.
Mir häwwe gstöwwert, gfuggert, gedauscht
un Liewesbäärli hinnerm Stoabruch belauscht.
Doch ejnes Doachs, doo woars vorbei
fürs erschte mit däre Lausbüwerei.
Die oane sin uffs Gymnasium kumme,
Die annere häwwe e Lehrstell oognumme.
Sou vieli Johr leit des zurück
die Bosse un des Juchendglück.
Mir sin in alli Welt verstreut,
doch wem mr treffe widder haüt
in Büscheme minanner ej,
doo möchde mr nomool Buwe sej.

Schulerinnerungen ans Gymnasium, Lehrerfiguren und kleine Katastrophen.

S Gymnasium, no besser bekannt als "Schiff",
woar domools für uns koan sou n räächte(r) Begriff.
Die Fogge, dr Fatzge, dr Bauch-Z, dr Gö,
dr Back un dr Schlingo, die Miss un ... oh je:
In Deutsch un Gschichte, wen hodde mrn do?
Koan annere als de Lutila.
Schnell hämmer kabiert in Bio zu glänze,
mit auswenni glernte Sentenze.
Doch host emool vergesse dich vorzubereide,
nocht woarst schnell dbei mit zwaamool zwaa Seide.
Host rümmghamblt, un is mit Geblärr
dir nunnergflouche dej Schulspeisgschärr,
des woar nocht der Gipfel, un awweil stand fest:
Der Kerle hot zu dem zwaa Stunn Arrest!
Woarst beim Urwaldbäse in Englisch droo:
"Du hast ja im Hirn nur gehacktes Stroh",
Sou zischt sie un weddert un schennt in oam fort,
host groad mool vergässe e oanzichs Wort.

Dej Urdeil woar gsproche mit: "Setzen, sechs!"
Die Fogge, die woar scho e schrecklichi Hex.
Künnt dr "Z" in die Klass mitm Hut im Gnick,
doo woar scho besiechelt unser Gschick.
En Stoß Hefde unnerm Orm hotr rejgedroache,
mim Fuß die Dür hinnerschi zugschloache.
"Aus euch" brüllt r "wird nie was Rechts mehr werre,
die Arbeit is vier, fünf und sechs" dut r blärre.
Sejchts, un druff kumme im hohe Bouche
die Hefde in die Klass nejgflouche.
Em Petrus, in Zeichne, is die Hoond logger gsesse,
wenn du host dejn Block odders "Rähmchen" vergesse.
In dr Pause hot dr Paul im Gang emool gepfiffe,
dr Schönich hotn sich druff uffgegriffe,
"Wann hast du die letzte an die Bagge gekriecht?"
"Iich?", sejcht dr Paul, "üwwerhaupt no nit".
Un scho hots links un aa rechts gekracht.
"Dann woars höchsdi Zeit", hot dr Schönich gsoacht.

Eine kurze Anekdote darüber, wie Neugier und Schadenfreude zurückschlagen.

Wasst no, wie dr Julier uns in Daütsch hot belehrt,
dass sou öbs is dumm un gruundverkehrt,
wenn oaner glotzt un zum Hiemel nuff daüt’t,
nocht stehne bleiwe en Haufe Laüt,
un du bist dann aa sou n blöder Affe,
siehst nix, doch dust mied noch ouwe gaffe.
Woars Zufall, woars Absicht, ich waß s nimmeh haüt,
dass ich hob n Paul druff hiegedaüt’t,
dass drüwwe uffm Dächle sich dun amüsiere
zwaa Spatze beim mehrfoache Kopuliere.
Der Julier - uff omool - hot glei gspannt,
dass doo öbs vorgeht, weil wie gebannt
mir zwaa häwwe zum Fensder naus gstarrt.
Der Julier künnt, sieht nix, un fühlt sich gnarrt,
denn unsere Spatze woarn, beglückt un froh,
bevor r woas gsähe hot, uff un devoo.
Er künnt uff mi zu un päckt mich am Kroache,
ziecht mich aus dr Boank- woas wärd r jetz soache?-
Sej Aache die spreche, sejn Mund, der bleit stumm,
er dut sich wouhl denge: bin selwer sou dumm
un loss von denne Kerli ins Boxhorn mich joache.
Mir woar nimmeh wouhl, mej Herz hot gschloache;
doch r lässt mi los un sejcht aa nix meh(r)
es woar halt for alli e guddi Lehr:
Vor Neugier is koan Mensch je gfeit,
selbst wenn r guddi Rootschläch geit.

Ein satirischer Blick auf Kühlschrank, Vorratshaltung und alten Hausverstand.

Wasst no, wie dr Öhm uns in Bio hot gäwe
Exempel un Rootschläch fors spödere Läwe?
"En Kühlschroank", sou sejchter, "sou e naümodischs Grät,
mr besser sich sou öbs nit kaafe dät,
denn außer däre daüre Investition
verbraucht dr Kaste dann aa no Strom."
Gell, des hädder scho vergesse,
woas e Gschäft des woar mi(t)m Esse?
For de Winder un for karchi Zeide
musst jeder gut sich vorbereide.
Gedörrt hot mr bei schwacher Hitz
die Öpfel- un die Biereschnitz.
De Keller woar de kühlsde Ort
fors Gmüs, s Kraut, die Öpfelhord.
Koum woar des Säule ümgebroacht,
Hot mrs in Dose ejgmoacht.
Mr hot gräuchert Flaasch un Wuurscht
un Moust gekeldert for de Duurscht.
Mr hot viel Ärwet ghoat mi(t)m Esse,
doch oans des därf mr nit vergesse,
ob ejglejcht, ob ejgweckt,
am End is oam halt doch verreckt
so manch(e)s, des woar äußerst schoad(e),
durch Milbe, Mehlwörm, Mäus un Mode.
"Des alles zejlt nit", sejcht der Öhm,
"obwohl de Kaste is bequem,
sich nie un nimmeh dut rendiere,
zu kühle un a ejzufriere.
Liwwer schmeißt r mool eweg
e fauls Aale, en ranziche Speck.
Des is bei weitem nit sou daüer,
wie sou e Kühlschroank Ugehaüer".
Mir häwwe groad sej Lehr kabiert,
do sejchter Öhm - scho räächt geniert:
"Ich konn s haüt selwer no nit fasse,
ich hob mrn Kühlschroank kumme losse".

BEI DE TURNER

Eine kurze Turner-Heimfahrt mit rumpeliger Straße und trockenem Witz.

Wasst no, wie mr in Schüpf bei eme Turnfestle woare?
Dr Addl hot spöt nachts uns hoamgfoahre.
Woas hot des grumplt un woas hot des gekracht!
Die Annlies rüft:" Addl, jetz geb doch mool acht.
Mir foahre in de Groawe, ich seh des no kumme" -
un scho hämmer de nächsde Schlitzgroawe gnumme.
Dr Woache dr höpft un r mecht no n Satz;
"När koa Angst," sejcht dr Addl: "mr häwwe no n Meter Platz."

Ein Vereinsstück über Turnmut, Sturz und erstaunliche Zähigkeit.

Wasst no, wie dr Erwin uns im Turne hot bewiese,
dass kammgriffs konnst drehe aa Ristgriffriese(nfelgen)?
Sej Experiment woar schnell beend ́t,
denn uffgedreht hots m alli zwaa Hänn(d).
Mr konnt nimmeh helfe dem arme Tropf,
er schlejcht uff de Boude mim Hinnerkoupf.
Dr Addl, dr Koarle, dr Fritz un aa ii(ch)
woarn käsweiß vor Schrecke - der Kerl is uns hii!
Woas söll ich dr soache, woas glabst dnn du?
Dr Erwin steht uff un geht im Nu
- nit ohne dass r zuvor no richt’t
sej Schnittlauchlogge aus m Gsicht,
un prüft de Sitz vom groade Scheitl,
- denn do drin is dr Erwin eitl -,
geht widder zum Magnesium Kaste,
er will jetz turne, will nit raste.
Der Kerle hotn stoarge Wille!
Em nächsde Doach, mit Sunnebrille,
treff ich n in dr Unnerstoadt.
Ob r aa gut gschloffe hot,
sou froch ich n, doch er bedaüt’t,
de Koupf ihm sakrisch weh dät haüt.
"Jetz geits när oans", soach i groad raus,
"Du gehst mr glei nejs Krankehaus."
Mr stellt dem Kerl die Diagnose:
Ghirnerschütterung hasst die Chose.

Eine Fahrprüfung mit Gländer, Schrecksekunde und viel Glück.

E annermool hot r mehr Glück
im Pech un mit m Missgschick.
De Führerschej(n), den wollt r moache,
Recht gut ging aa die ganze Sache.
Bis vor dr Kröit, am Badewerk,
er nimmeh richt’t sej Aachemerk
uff alles, woas mr ihm hot glehrt,
un pfeilgroad er ins Gländer fährt,
weil r, statt uff de Wäch guckt räächt
der Hela schönni Aache mecht,
die ouwe er am Fenster sieht,
un drüm aa nit die Kurve kriecht.
Dr Prüfer usanft uffgeweckt:
"Woas is n bassiert?", fröcht dr verschreckt.
Dr Mott sejcht schnell – un woas for n Säche -
"en Stoa is uffm Wäch gläche".
Sou hot bestanne trotz Missgschick,
dr Erwin sej(n) Führerschej(n)prüfung mit Glück.

Eine ausgelassene Mühlenszene, die fast in eine vorgezogene Silberhochzeit kippt.

Wasst no, noch m Turne in dr Gymnasiumshalle
hotn Schobbe uns allemool gut gfalle.
Mir häwwe üwwerlejcht un häwwe uns besunne:
Gemmr ins "Türmle" oder gemmr in die "Sunne".
"Wärtshäuser", druff sejch dr Fritz "geits viel(e),
haüt gemmr zu mir in die Halwichsmühle".
S woar anneme Freidoach, ich waß no wie haüt,
denn zwaa Doach spöter woar Silwerhochzeit
vom Fritz sejne Eltern, die worn scho im Bett,
als mir in die Mühle sin kumme sou spöt.
Die häwwe scho gricht ghoat alles fors Fest,
gekocht un gebagge forn Haufe von Gäst;
vom Kuche, vom Ploaz alli denkbare Sorte,
die Tante hot kunstvoll verziert ghoat die Torte.
"Dii müßt er versüche", sejcht dr Fritz, un r schneid’t,
dass for jeden von uns großi Stügger es geit.
Die hot uns gschmeckt, un mir woarn sou vermesse,
mir häwwe die Torte schier uffgesse.
Des süße Zeuch mecht sou räächt oam Duurscht
un Hunger uff Gräucherts un aa uff Wuurscht.

Dr Diisch woar reichli mit allem gedeckt,
woas söll i dr soache: des hot uns gschmeckt.
Mir woarn aa räächt fröhlich un ausglosse.
"Seid still, wenn r nausgeht uff die Gasse!"
När oans des hämmer nit bedoacht,
dass mir mehr Krach als die Mühle gmoacht
un de Schlof von de Eltern häwwe gstört.
Zeräächt woar m Fritz sejn Voadder empört.
Er ruft ausm Fenster – un gar nimmeh zahm:
"Ihr Lumbe, geht r jetz endlich hoam?"

ES WOAR EMOOL...

Eine historische Erzählung um Treue, Macht und einen folgenreichen Schlüssel.

Es woar im Johr zwölfhunnertvier
zwa Doach vor Michaeli,
die Noacht woar rüm, dr Doach nit weit,
scho hell wärds drauß allmähli.
Vom Kärch(e)turm dr Sankt Martinskärch
hots sechsi groad gläut’t,
do kumme zu der Frühmess groad
emool e boar aldi Laüt.
Jetz oawwer schnell raus aus de Bedder
un nit lang dhoam no rümmgegafft,
Nemmt Oamer, Büdde, Schlaüch un Wännli,
Wasser wärd ebei gschafft
for die Küche, s Vieh, zum Wasche,
zum Butze, Wüsche un forn Duurscht
fors Schlachtfest, um die Sau zu brühe,
for die Gredd(e)lsubb(e) mit Bluns(e) un Wuurscht.
Vom Schlossbärch bis zr Unnerstadt ,
vom Markt bis zr Dörgai,
kumme zu dr Brunnestuwwe
Borsch un Maadli bei.
Doo wärd verzejhlt, gred ́t un gebabbelt,
gsunge un a glacht,
"Host scho ghört, wer waß des scho,
basst uff un gebt räächt oacht:
Die alte Gunde leit im Sterwe,
dr Müllers Franz noch Dibber* ziecht,
die Hanni von dr Klostergass muss heiere,
weil mr scho öbs sieht?"
Uff aomool hört mr blose laut
vom Türmersturm de Wächter,
"Oh liewer Gott, steh uns jetz bei",
verstummt isses Glächter.
"Woass is bassiert, woas konn des sej,
brennts odder kumme Räuwer?"
Rennt schnell mool uff de Schlossplatz nuff,
dann hört ers aa glei selwer.
Es is dr Bote von Kurmainz,
künnt groad durchs Dor gridde,
am Jächerhaüsle mecht r Halt,
im Schlosshouf, in dr Midde.
"Ei, isch bin von Meenz" sou hört mrn soache,
scho steicht r von sejm Gäule
"dr Bischof schickt un läßt berischte,
ei, dr Vogt möscht sisch beeile
un kummen zum Konvent nach Meenz,
denn viel wär zu bespresche.
Des ganze könnt r lese nach,
steht do in der Depesche".
"Kummt erscht mool rej un trinkt n Schobbe",
sou hört mrn Vogt jetz soache,
"Losst schmagge euch de Edelbärch
un vesbert Schwartemoache."
"Mej Kunigund", dr Vogt sejcht druff
nocht zu sejm junge Weib,
"Ich muss zum Bischof nuff uff Mainz,
bleib keusch an Seel un Leib.
Die Traü, die du mr oanst gelobbt,
söllst du mr aa beweise;
Drüm schließ dejn Schoß ich dr jetz zu
mit sellem Görtl-Eise."
"Mej liewer Moo, mej Ei(n) un Alles",
die Kunigunde flennt,
"Kumm mr bloß gsuund schnell widder hoam,
die Lieb im Schoß mir brennt."
"Moach dr nix draus un denk dr nix,
ich wärd scho widder kumme,
dr Bischof find ́t doch gwieß sou schnell
nit nommool sou en Dumme.
Doch söllt uff mejnre Reise mir
e Missgschick mool bassiere,
wärd ich drüm sellen Schlüssl doo
bei mejm Fraünd deponiere."
Scho reid ́t r ausm Städtle naus,
stolz uff sejm broune Gäule,
die Kunigunde winktm noach,
dut no(ch) a bissle haüle.
"Mr müsse erscht noch Külse* naus",
sejcht r zu sejm Begleiter,
"Beim Fraünd, dem Burchgraf, bleiwe mr,
un morche gehts dann weiter."
De Stammbärch nuff, durchs Hoddelouch,
dann uff die Hohe Stroße,
un als r Külse* leiche sieht,
lösst r de Herold blose.
"Do drüwwe uffm Brückle, sisst,
do steht r un dut winke",
dr Burchgraf selwer grüßt de Vogt:
"Kummt rej un dut öbs trinke.
Mr häwwe groad am lange Spieß
en ganze Ochs gebroode,
do könnt r achle, esst när räächt;
uns is aa gut groode
dr Moust un Wej vom letzte Johr.
Vom "Hohe Herrgott" schenkt euch ej(n),
aa söll dr Barde spiele.
Mr wölle haüt räächt lustig sej(n)."
Doachsdruff in aller Herrgottsfrüh
zum Fraünd dr Vogt sich wend ́t:
"Söllt sterwe ich un nimmeh sähe
mej Kunigund am End,
söllts d nemme du, zu traüi Hänn(d),
de Görtl-Schlüssl kloa,
doch erscht, wenn ich verbliche bin,
do künnt des Eise roa."
"Sei ubesorcht bass uff Di uff,
grüß mr räächt schö de Bischof."
Dr Vogt sich in de Sattl schwingt
un reid ́t gschwind aus m Burchhouf.
Zwaa Doach, zwaa Nächt, e Ewichkeit,
es wärd oam scho zuviel,
wär mr när scho in Mainz am Rhej(n),
wär mr när scho am Ziel!
Jetz no vorbei am Schrecke Buusch,
un durch die diefe Klinge,
wenns dunkl wärd un s aüch räächt kraust,
doo dut r bissle singe.
Er drehbt sich üm, guckt hinnerschi ,
halt, woas künnt do von hinne?
Mr sieht e Wolke voller Staab,
en Reiter middedrinn(e).
"Moacht aüch bereit, ziecht euer Schwerter,
jetz müsst rs beste gäwe,
von hinne künnt n Räuwer her,
will uns an unser Läwe."
Jetz is s sou weit, jetz is r doo! ———
Des is koan Räuwer nit,
es is dr Burchgraf, sapperlot,
worüm de schnelle Ritt?
"En Lüchebaütl hass ich diich,
koan Fraünd fors ganze Läwe,
denn du host mir, un des is gwiß,
de falsche Schlüssl gäwe."

... un haüt

Ein spätes Satirestück über englische Einsprengsel und Sprachmode.

Host ausglernt odder aa studiert -
woas mr glehrt hot aa kabiert,
host großes Wisse un aa Könne,
möchst schaffe un dann dir woas gönne,
doch dust koa "Denglisch" du verstehne,
musst nomool uff e Schul no gehne
un lerne wie mr haüt dut soache,
sonst dust di ümesunst du ploache:
E Gschäft hasst business un en Loade shop,
e Abteilung department un e Stelle hasst job.
S Wisse hasst knowhow un die Fraüd is fun,
öbs Zammegstellts is all-in-one.
En Trugger is n printer un n Bausatz n kit,
Is woass los dann is action, bist gut druff, dann bist fit.
D Michel hasst Mike un d Sepp hasst mr Jo,
du bist bloß no happy, du bist nimmeh froh.
Willst zoahle an de Kasse, gehst zum point-of-sale,
dust n Brief oam schreiwe, dann schickstm e mail.
Host viel Ärwet un Ärcher, dann bist voll im stress,
E Zoaloatsoß hasst dressing, woas zum Oozieche n dress.
Dut dr gut woas gfalle, sou is s top,
geht dr mool woas dernäwe, sou is s n flop.
Fast food sejcht mr zu me Schnellimbiss haüt,
feedback zu r Rückmeldung, un feeling bedaüt’t
e Stimmung odder Ahnung un fashion hasst Mode,
e sideboard is sou öbs wie früher e Kommode.
E baby is e kloans Kiend un n boy is n Bu,
hot oaner Geburtsdoach, singst: Happy birthday to you!
Indoor hasst drin un veraltet hasst out,
lover dejn Schatz un spouse is die Braut.
Cool is haüt alles, waos der gut gfällt
un wer lässich doher künnt als Weiwerheld.
Setzt du dr e limit, moanst dmit e Ziel,
brain storming hasst mr e Gedankespiel.
Wer sorry sejcht statt dut mr laad
un chocolate kaaft un nit Schogload,
Wer denglish babbelt, denglish red ́t
moant er wär in un up-to-date.
Mrn arme Irre besser nennt,
der nimmeh daütschi Wörter kennt,
gedankelos un geistesschwoach
verhunzt sej schönni Muddersprooch.

Irmgard Wernher-Lippert

Diese beiden Texte liegen uns bereits in Büschemerisch und in hochdeutscher Parallelfassung vor. Die Büschemer Version steht oben, die deutsche Fassung kann satzweise oder komplett eingeblendet werden.

Texte 2

Die ünner Bleich

Erinnerungen an Wörth, Bleichplatz und Gänsgarten mit deutscher Parallelfassung.

Satzpaare 11

Nicht wortwörtlich, sondern idiomatisch übersetzt.
Besonders wertvoll für Tempusverschiebung (Imperfekt -> Perfekt), Dialektgrammatik und feste Formulierungen.

Früher hat dr Wörth ganz annerst ausgsähe.

Do wuu haüt des Grünnerzentrum steht, woar früher des oalde Schlachthaus unn hinnedro dr ejgezöinde Gänsgarde, wall do die ünnererdisch verlejchde Oalde Boach, wie mr zum Mühlkanal gsocht hat, widder offe rauskumme is.

Dorthi hat die Gänsherdin, die oald Naüsern, jeden Moarche die Gäns getriewe, wuu sie vorher bei de Haüser ejgsammelt unn die Boadgasse für getriewe hat.

Uff der Wörthspitze woar die Bleich för all die kloane Haüsli in der Dörgei unn de Armegasse, wu weder ä Höifle, no ä Gärtle odder goar ä Balgönle ghot häwwe.

Wu hät mer denn die Wäsch sunst druckne gsöllt?

Am Waschdoach hat a unner Omma die Bettdücher miit em Ziichwächele uff die Bleich gführt unn ausglejcht.

Ejnes Doachs jedoch is sie lamedierend hoamkumme unn hat üwwer die Scheißgäns gwewwert, wuu aus ihrm Gehejch ausgebroche unn groadwächs üwwer die weiße Bettdücher zur Dauwer gwatschelt wäre unn dodebei Haüfli unn gelbgrüni Dabbe hinnerlosse hätte.

Groadraus: die Wäsch war verschisse!

Unn der arme Fraa is nix üwrich gebliewe wie alles miit de Hänn rauszuriwwle unn widder zu koche!

10.

Schejnts häwwe siich ä boar Kröidebuwe, die Routzlöffel, die, än Bosse draus gmocht, es Gänsgardedöörle uffstehne zu losse.

11.

Gfunne senn sie nie wordde.

Üwwers Hochwasser

Ein Orts- und Erinnerungsstück über Hochwasser, Kaimauer und Wörth mit deutscher Parallelfassung.

Satzpaare 11

Nicht wortwörtlich, sondern idiomatisch übersetzt.
Besonders wertvoll für lokale Sachtexte, Nebensätze, Passivähnliches und Dialektgrammatik in längeren Sätzen.

Daß dr doo sou trauli sinniere unn dem Treiwe uff der kloane Dauwerinsel zugugge könnt, häbt ´r dem Hochwasserschutz zu verdanke.

Der woar notwenni, wall die Wiesegräwe, wuu als Stauroum gedient häwwe, zugebaut wordde senn.

Selles raffinierde Be- unn Entwässerungssysdem zwüsche Diddiche unn Ümpfi hot mer braats 1866 im Zuch von dr Dauwerbegroadichung ausgedüffdelt, üm dodemiit nid ner die Flut schneller weiderzulaade, sunners a de Fuddererdroach zu hejwe.

No ja, es gebt jo koa Viehbaure meh!

Sou senn die Grünner rümgmocht odder zugebaut wordde.

Spödesdens seid dem verheerende Hochwasser am Fronleichnamsdoach 1984 waß mer, daß mer dodegeche öbs moache muß unn hot die „Kaimauer“ am Wörth gebaut.

In oalde Zeide häwwe siich die Laüt oarch gförcht vor em Hochwasser.

Bsunners schlimm woars in de 1770er Johr, wuu im ganze Dauwerdoal verschiedensdi Brügge wechgrisse wordde senn.

Bei uns häwwe drei Pfeiler, die Brüggeheiliche unn die Leonhardskabelle droglaawe gmüßt.

10.

Sell häwwe a die gschnitzde Wassermänner unn -fraali uff em Lieblerhaus nid abwehre gekönnt!

11.

A wenn soddi Nixe in viele annere Städt, wu am Wasser laiche, a ze finne senn, künnt uns nadürli des Märle von dr Schönne Melusine uff dr Aülschärwemühle bei Goammeri in de Sinn.

Hugo Pahl

Die bislang vorliegenden Hugo-Pahl-Texte werden hier wie bei Dürr und Bärthel als aufklappbare Originalstücke gezeigt. Eine hochdeutsche Parallelfassung liegt uns dafür im Moment noch nicht vor.

Texte 20

Ein Liebes- und Heimatgedicht auf Bischeme mit Blick über Stadt, Tal und vertraute Orte.

Uff'm Höhbercb drouwe, wenn i steh,
Unn, -
Sou moannichs Stünnle als, -
Runner uff mej liewes, traulichs Hoametstädle säh,
lacht laud mej Herz,
Unn i wärd sou räächt vonn inne froh:
Mej BISCHEME,
soacht, leit's nid goanz
ausgsücht herrlich doo?
Unn wenn i uff'n Hoammberch geh
Odder nüüwer zu demm Holler von dr Friedrichshöh,
Vomm Spraad goanz ouwe nunner gug ins Dauwerdoal:
Immer,
Immer widder soach iech zu merr jedesmoal:
BISCHEME,
Liebs, kloans Städtle mej,
Freundli, wi weid unn breid koa(n) oanners,
Schaust' du vonn alle Seide drej.
Unn wenn i goar mid unnerm Züchle gfoahre kumm
Unn binn - weid unne no - kaum um die grousse Biechung rumm,
Unn woar i närchends oannerst als in Dibber odder aa in Laude drouwe,
Doo gug i hald zum Fenster naus
Unn duu mej Städtle üwwer alles louwe:
Stoulz wi änn Dom
Frei in de Hiemel naus
Raacht houch empor ess Goddcshaus
Unn dezu dr Käärcheduure
Unn üwwerm steile Doach vomm oalde Schlouss dr aldersgraue Dörnersduure.
Woass ehnlichs gäbt's nid üwweroall
Unn goar nid scho in Werde
Odder aa
Im schönne Merchedoal.

Eine rasante Lausbubenszene mit Feldschütz, Wassergraben und einem sehr knappen Entkommen.

Lausbuu!
Bleibst merr aus dr Wiesen haus!
Woas? Dreckspatz!,
Leckst a no di Zunge raus?
Wart!
Diech Vreckling wärd i krieche.
Dr Fääldschütz rennt mit Riesesätze,
Unns Fritzle muß verdeufelt schnell um sej bißle Lääwe wetze ...
Verdoammt, o jeh! Doo kummt änn Groawe.
Moach's Testament, Fritzle,
Jetzt wärd'r die gleich hoawe ..... .
Ja, host'r gedoocht ..... .
Sou änn Schlingel! .... .
Knapp devor schlejcht dr Fritz,
wi dr Blitz sou fix,
änn scharfe Hoake
unn lösst dr Fääldschütz,
mir nix, dir nix,
in de volle Wässergroawe joache.
Lachend steht ess Fritzle doo,
freut sich oorch,
dreht goar ä longi Noase ...
Dr Fääldschütz oawwer flucht, deubt unn rufft:
„Wardd närr!
Brauchst nid ze lache!
Morche geht drs oann de Kroache.
Ih kenn di, Jörch,
I wärd's dejm Lehrer soache."

Ein genüssliches Küchen- und Backstubengedicht über den Quetschichplatz und seine ganze Wirkung.

Dr besde Ploatz vonn
alle Plöötzer,
däss iss gonz gwiess
dr Quätschichploatz.
Mörb muss sej dr Daach unn dünn,
beinooh wi ä Bladd Babier.
Ouwe druff köört änn Beloach mid Quätschich,
dickedick zusoammeglejcht,
wi bei de Hääring schier.
Beisst merr doann nej, laaft saftich Kinn unn
Backe runner di zuggersüße Brüüh,
unn Henn unn Maul dunn klejwe unn dunn babbe.
Jaa, sou iss'r rächt, nid oannerst därff'r sej.
Dutt merr närr koa(n) Weckmähl druff,
ess Best vomm Ploatz, dr Soaf t,
däär druckent doo joo ej.
Hei, wi schnalzt di Zung,
unn alles schmatzt unn schleckt,
wuu douch dr Ploatz sou lecker schmeckt.
Unn nix hört merr heint,
koa(n) Gschraa wi sunst oamm Diesch.
Zu dunn hot jeder blouß mit siech.
Dr Märdle moant: „Ess grouße Blääch iss scho glei läär.
Geh zu, Mudder, duu hald no ess zwadde häär."
„Erst werdde aa die Krustestücker gässe.
Hoab iech merrs doch gedoocht,
doo druff iss koaner orch versesse."
Unn's dritte Blääch kummt aa no bei,
Koa(n) oanzichs Brössele därff üwrich sej.
Jaa, guud iss dr Quätschichploatz
widder mool hejnt gwääse,
Unn morche glei
däät i scho widder oaner ässe.

Eine liebevolle kulinarische Aufzählung von Bischemer Speisen, Getränken und Quellen.

bei Quätsche- und Öpfelploatz .“laaft oam ess Wasser im Maul zoamme",
sondern auch wenn es gibt:
Zemmede mit Griewe unn Biereschnitz;
Kreddelflaasch mit Hoasebrood unn Opfelmoust;
Klumbeploatz, fingerdick di Klumbe unn dünn dr Hejfedaach;
Gräucherts, Kardoffelbrei unn Sauerkraut;
Bibbeliskääs, zu Schejlkardoffel;
Schoffeuderli, Stölleli, Bretzli vom Sendnersbeck;
Stöpferli, auch Buwespitzli genannt, unn Öpfelbrei;
Schnäggenudel oder Oufekunze, dazu Hutzel, dörri Quätschich;
Zwüwwelkuche unn Fädderweisse;
Wejnachtsgutzli: Pfäffernüßli, Springerli, Läbküchli, Anisplätzli;
Quätschelatwärche, Ejgebrockts, Ejgmoachts, Ejgebrennts;
Riwelisploatz, änn Kärschemichel;
Hejfeküdili, Fassnachtskrapfe ...

dazu, je nachdem, damit es besser rutscht:
änn Reißer,
Babblwasser, Quätschichschnabs,
Öpfelgieg, Öpfelzwiere,
Süsse, Eichebräu,
sauri Milch, Buddermilch,
Eddelberchwej,
Waldmeisterbool, Glühwej,
ä Schorle-Morle

Quellwasser vom:
Moisibrünnle,
Silwerbrünnle,
von der Hungerquelle,
vom Fronebrunne,
von der Daawerdlequelle.

Ein kurzes, trockenes Miniaturstück über Besitz, Alter und den stillen Stolz auf ein eigenes Haus.

Moancher wäär nid wenich froh,
hätt'r jetzt groad sou ä aldi Hüdde doo.
Schöö freilich sieht se nid groad aus.
Doofür bist oawwer aa eichner Härr im Haus.

Eine kleine Dorfanekdote, in der Dörrfleisch, Gottesdienst und Kochdopf herrlich durcheinandergeraten.

Ess hot ämool ä braavi Bischemer Hausfraa erst on dr Kerchedüür gemerkt,
dass si jo ess Dörrflaasch vergesse hot, ins Kraut zu due. Do iss si
halt schnell noämool hoamgrennt und hot in aller Eil änn orndliche Fätze
Gräucherts ins Kraut gschmisse unn is mit'm Gsoangbuuch unnerm Oarm
widder in dr Kerch erschiiene.
Wi si doo ins Lied .“Sion lass dein Lied erklingen" ejstimme unns Buuch
Uffschloache will, sieht si, dass si jo ess Dörrflaasch oanstatt emm Gsoangbuuch
mitgnumme hot: Um Himmels wille, i wärdd doch nid ess Gsoangbuuch
in di Brüüh nejgschmisse hoawe?
Dehoam oawwer in dr Küche im Kochdoupf bassiere währenddem wunnerboari
Dinge. Ess Kraut fengt laut zu singe oa(n) unn doann beim Esse
hot die goanze Familie singe müsse.

Ein großer Rundgang durch die Dörgei, voller Gerüche, Geräusche, Nachtbilder und Morgenszenen.

Walachei,
Bolagei,
Mongolei,
aus Klein-Venedisch.
Moacht's doch wi iech unn nemmt Euch Zeid
gwiess häbt'r droo di grössde Freud -
unn laaft mid mir durch di Dörgei.
Wooass oanners braucht'r nid debei als:
Guddi Aache, festi Schuh,
woass zum Raache
odder ä verschnupfdi Noas dezu.
Unn ä frohs Gemüüd
als Hauptsach
nemmt'r oam besde
aa no mied.
Schpitzichi Giewel,
krummi unn gonz engi Gasse,
Miesthöuf vorm Haus,
Drääg "en Masse":
däss iss for di meiste Leud
Di Bischemer Dörgei.
Iech oawwer hoab oanneri Aache.
Mir gfellt's doohinne guud.
Drumm duu iech's Euch aa zaache.
Schöö iss gwies bei Mondeschej
Änn Oowendgoong durch di Dörgei,
wenn's nid lärmd unn nimmee kloupfd
unn silwri s'Liechd vomm Hiemel troupfd.
Fej risseld's vonn de Dächer runner,
laaft wisselflienk die Kendel nunner:
Doo flimmerd's in dr alde Boach
sou hell schärr
wi di Sunn oam lichde Doach.
Schadde,
spitzich wie di Giewelegge,
leiche finster uff dr Strooß als schwoarzi Flegge.
Unn dr Moa(n) im Moond mit sejnem stille Treiwe
lachd mi oo(n) aus alli Fensterscheiwe.
Di Pfitsche goar glenzd schöö wi Eis.
Unn
üwwer allem webd änn fejne Nääwelduunst . 
hoamli
Gschpenstergschichdli wunnerboar
unn
leis.
Guud iss di Luft
in dr Dörgei
sou Sunndoachs, wenn
di Käärch verbei.
Aus alle Häuser kummt änn Duuft. -
Däss moacht jo groad di gudde Luuft. -
Unn raache dutt doo ieder Schloot
aa dort, wu sunsten trugge Brood
moacht Woange rood.
Änn Duft, soach iech, steicht in di Noase
vonn Gense-, Ende-, Hoasebroote.
Doo riecht's nooch Knöchli, Schweinespääk unn Sauerkraud.
Ausse hört merr schärr,
wi oaner schmatzt unn mid volle Backe kaut.
Sell Subbe, bääh, schmäggt nooch Spitoal.
Beim Schorsch gäbt's Fiesch unn Räucheroal.
Unn gääre dätt i goar versuche
sellen fettgeschmorte Schinkepfoannekuche.
Nääwe droo(n) stinkt's nooch verbrennt,
- wüüscht hört merr, wie di Mudder schennt. -
Gääwe hätt's scheins Brootkardoffel,
sou oawwer schmäggt's nooch schwoarzversengdi Filzbandoffel.
Beim Ondrees drüwwe woaren's dässmool diggi Bohne.
Ih riech's,
scho sänn si droo(n), sich zu vertone.
Puh, doo schmeisst's mie's beinooh hie(n).
Pfuundwaas schejboar wörcht merr doo hinunner
Limburcher Kääs unn Knoweli.
Wäär nid änn Gruch vonn Bohnekaffee hinnenooch no kumme,
mej armer Koupf däät heud no gonz gewaldi brumme.
Wärd Du sou oald mool wie sell Haus!
Glaab merr's,
doann siehst'e no gonz oannerst aus.
Hungrich in dr Herrgottsfruh ,
Brüllt im Stoall emm Schorsch sej Kuh.
Wie doann's erste Frühliechd blitzt
Änn Goggel fix sejn Schnawwel spitzt.
Er bläht sich uff unn kräht gonz laud,
Di Hünger s'fast vomm Stengle haut:
Dr Doach bricht oo(n) unn's wärd scho hell.
Wacht uff, kummt raus, wacht uff!
Schnell, schnell ... !
Unn knarrend schlisst dr Sebbl uff
Sej Door unn stellt sich uff di Staffel nuff.
Dasche in dr Hoond, sou steht'r doo.
Unn spatzt unn schnuffert alles oo.
Er reibt sich fest di Aache aus
Unn blinzelt schlööfrich in de Hiemel naus:
Gäbt's Rääche hejnt, gäbt's Sunneschej: ...
Ih moan, verdächdi schaut's scho öbbes drej
Di Kabbe schiebt'r dief ins Gnack,
Kratzt sich oam Koupf,
Schnäuzt laud di Noase oab,
Dreht sich doann rümm unn geht ins Haus
Unn mist als erst's de Stoall schnell aus.
Sou treibt merr's frühs in dr Dörgei.
Wuu oannerst wärd's genau sou sej.

Kurze Beobachtungen aus der Dörgei: Sonntagsruhe, neugierige Fensterblicke und halblaute Dorfdramaturgie.

Dr Koarle
guckt zum Fenster naus.
Woas macht's,
dass goar nix los iss drauss?
Er glotzt hald naus.
Himmlisch iss di Ruh
in dr Dörgei,
wenn's Sunndoachsesse groad vorbei,
Weid unn breid hörst doo koa(n)
Schried unn Laud:
Ganz Bischeme
dööst,
schlööft,
gähnt ...
unn
verdaut.
Ja, Anna!
Schlimmi Sache kumme vor.

War's douch wenichstens verlouche.
Sou oawwer issess aa no woahrscheins wohr ... :
Di Marri
iss ä falschi Katz .. unn
der Fritz, ihr Moo(n), däss ... ?
Änn ausgsücht frächer Fratz .. .
Jöddich, ess läud scho zoamm .. .
Doo muss iech oawwer moache,
dass iech no schnell in d'Käärch
nej konn.

Di Katrin
spitzt zum Fenster naus.
Neugieri dreht si schärr di Aache raus.
Di Ohre luure scho bei jeddem Schried,
joo damit
sie's nid verhört
unn mehr als gwicss aa sieht,
wäü drunne laaft verbei.
Unn möuchs aa blouss
dr gröussde Ejsel sej.

Ein spöttisch-zärtliches Stück über die Alte Bach, ihr Wasser und alles, was sich darin und darum tummelt.

wenn iech Euch soach -
iss schöö wi dr
Canale Grande
zu Venedisch im
Welschen Lande.
Änn Haufe Brügge führe nüüwer.
Drum foahre aa koa(n) Gondel drüüwer.
Oawwer Gens unn Ende schwimme rumm,
Ratze aa unn sunst no moanches Drumm vonn Alderdumm:
Verlausdi Hünger,
doodi Spatze,
räudichi Hünd unn
vreckdi Katze.
Uff oa(n)mool moanst, doo springt änn Fiesch;
debei woar's bloos dr Rääst vomm Middoachsdiesch.
Unn aldi Schärwe flieche runner,
Kabuddi Noachtdöpf sänn aa drunner.
No öbs weider unne oawwer steht ä Fraa
unn schrubbt eifri Unnerwesch vonn ihrem Maa(n).
Däß Wasser mid viel Fraad unn Spaß
säuft doann ä Milchkuh in dr Kloustergaß.
Sou treibt merr's oan dr alde Boach
immer scho seid Joohr unn Doach.
Däss Haus
mit
sejner schönne
Bruck
wärrd gschärmt
unn gschützt
vomm heilche
Nebomuk.

Ein Gartenmonolog voller Trotz gegen Politik, Zeitung und Weltlauf zugunsten des eigenen Feierabends im Grünen.

Wuu ih geh
Unn
Wuu ih steh,
Ob ih sitz odder bei dr Ärbt räächt schwitz,
Denk i bloos - unn ih konn's kaum derwarde -
Onn d'Feieroowend drauss vor dr Stoadt
In mejm gepfläächde Gmüüs- unn Blummegarde.
Woas geht miech oo(n) doo drauss di Wääld?
Die? ... Die rennt sich doot no nooch ihrm Gääld.
Woass schäär iech miech um Bolidig?
Mej Kraudsköpf werdde doodevoo nid dick.
Nix leid merr droo oamm Gmoanderood.
Nix oann dr Zeiding, emm Stadtpfarr sejnem Uffgebot.
Nix leid merr droo, vonn nix will iech wisse.
Nix, ohne miech, uff alles iss vonn mier aus druffgepfiffe.
Jaa,
Iech konn däss kaum derwarde,
Bis iech, woachse höör di Kraudsköpf in mejm liewe
- hei, wenn's närr scho Oowend wäär -
In mejm - - - schönne Garde.

Ein deftiger Arbeits- und Feldmonolog gegen Müßiggänger, Bürohocker und alles, was nach unverdienter Bequemlichkeit aussieht.

Miet
Pfuhlfoass,
Beitsdi unn
Kuhfuhrwerk
dr Fitzer uff sej Fääld naus fehrt.
Wi er sou sej Kühli lenkt,
begugt'r siech di Wääld
unn denkt:
Doo laafe si, mir zum Bosse,
Middoachs scho spaziere
unn
dunn sich üwwer miech,
frech a no, amüsiere.
Plooch iech miech oab
in Strööm vonn Schwaass,
derwaal di Sunn brennt sengend haass,
dunn die glotze schöö
unn gaffe:
Soodi fauli, dummi Büroaffe,
Glatzköpf,
Stuwwehocker,
Dindekleckser,
Bücherwöörm.
Ess Hiere söll ne vollends
uff dr Stell
verdörrn.

Ein heiteres Rundgangs- und Wirtshausgedicht über Spazierwege, Gewohnheiten und Bischemer Lebensart.

Dr Groawe rümm,
Di neue Strooss ä Stückweid naus.
Hernooch di Stoadt gonz nuff
In d' Voorschd
Schärr bis zum Rincker draus,
Doann
Rümmgedreht unn widder rej.
Ä kloans Gebatsch no unnerwäächs,
Zwaa Moass Bier im Hoammel
Odder aa
Beim Kronewärd ä Värtele Wej:
Däss
Iss in Bischeme ewich scho in grosser Mode:
Vonn dr
Kinnerschees
Üwwer denn
Gepflechte, kuchelrunde Bauch
Bis zum
Friedlich seelchen Tode.

Ein zweites Alte-Boach-Gedicht, diesmal stiller und nachdenklicher, mit Mondlicht, Mühle und Vergänglichkeit.

Moanchesmool
Glenzd si schöö im Mondeschej.
Moanchesmool
Hüllt weisslich foahler Nääwelduunst si ej.
Hie unn doo
Rauschd laud si uff im Welleschloach
Unn rinnd doann leis dehie
Immerfort
Durch Joohr unn Doach.
Häusli stehe um si rumm,
Groamgebeucht
Goanz buddich krumm.
Si spichle,
Fröhlich wi di Kinn,
Mid Lichder, farbich schöö, im seichde
Wasser drinn.
Wie d'Boach sou rauschd ohn Rast unn Ruh,
hört draurisch, müüd, die aldersgraue Mühle zu.
Vermorschd
Iss lengst ess Wasserroad,
Wuu'd klabberd hot oanst früh unn spoat.
Koa(n) Waaz,
Koa(n) Koore kummt mee nej:
Im Lääwe dutt's bald mool nid oannerst sej.
Ä Kiend,
Wäär woar zu sellrer Zeid,
Köört jetz scho zu d'oalde Läud.
Di Häusli all,
Wäär waass däss scho,
Wi loong si stenn beisoamme no?
Unn ob die Boach raund immerzu?
Waas iech's emend?
Waast's vielleicht goar
Duu?

Ein Frühlingsgedicht über Tauwetter, Luft, Sonne und die unbändige Lust, endlich wieder hinauszugehen.

Naus zuu's endli,
Naus zuu's geht's.
Ess Frühjoohr kummt unn drausse weht's
sou mollich woarm
vonn Süüde häär
unn fäächt vomm Schnee di Fäälder läär.
Ess troupft unn
risselt üwweroall.
Wässerli strööme ohne Zoahl.
Viel Bäechli glenze in dr Sunne,
unn's Doal dutt goar
scho schwimme unne.
Doo treibt's miech naus
mid aller Gwoald,
wuu's drauss sou herrlich woarm
unn drinne koald.
Wenn d'W achdel schlejcht
unn d' Amsel rufft,
doann
eil iech naus oann d'Frühlingsluft.
Iech setz miech in di Sunne nej.
Woass koann im
Frühjoohr schönner sej?
Unn guck mi ümm
unn guck
unn staun
unn möuch koum mejne Aache draun:
Onn dääre wiendgeschützde Stelle
dunn scho goar
di Knosbe schwelle.
Ä Bläddle spitzt scho frech hervor:
Jaa, isses denn aa
werkli woohr?
Gestern no woars orndli koald.
Unn heud?
Hei,
jetz wärd's Frühling boald!

Ein Erinnerungsstück über Fasnacht, Bouzen, Hejfeküchli und den Christkindlismarkt mit viel dörflicher Direktheit.

Oan Fassnacht, doo woar's als schöö hier in Bischeme. Doo hot's for uns
Kinner guddi Hejfeküchli gääwe.
Im Türmle hinne woare di Foasenachtsbouze drinn. Wir Kinner sänn als
dorthie gonge unn häwe in oaner Duur gschriee:

„Foasenacht, Foasenacht!
Di Pfoanne kracht.
Küchli raus!
Odder i schloach dr
ä Louch ins Haus!"

Do sänn di Foasenachtsbouze raus kumme mit Säubloose oann ihre
Stäcke, sänn uns noochgrennt unn doann häwwe merr singe müsse unn
häwwe aa Hejfeküchli kriecht.
Gsunge häwwe merr als:

Hoari, hoari, hoari iss di Katz.
Unn wenn di Katz nid hoari iss,
Doann fengt si aa koa(n) Mäus.
oder
Alli Kätzli senn no blinn,
Wenn si koa(n) oacht Doach oald sinn.
oder
Lustich iss die Foasenacht,
Wenn di Mudder Küchli backt.
Wenn si oawwer koani backt,
Pfeiff iech uff di Foasenacht.

Früher fand vor den Weihnachtsfeiertagen der Christkindlismarkt statt.
Da kamen immer die Zuckerbäcker von Walldürn und boten uns Kindern
ihre Herrlichkeiten an.
Die Düürmer riefen uns zu:
„Schiffli unn Schisserli,
Läbkuche unn Hörzli,
Zuggerreuter unn Nunneförzli,
Makrönli.
Alles bloos forr drei Pfenni!“

Eine kleine Sammlung alter Bischemer Aussprüche und Charakterköpfe, halb Anekdote, halb Dorfarchiv.

„Was spricht man von Dr. Braun?“
„Dass'r ä Rindviech iss."

Vom alten Seelmann
„Mir sänn drei Winter liwer wi oan
Summer."

Derselbige, als seine Gäule die
schwere Ladung nicht ziehen wollten:
„Wäärd'r Pfarr worde, wäärd'r Pfarr
Worde! Bräuchd'r häud koa(n) Stemm
zu ziehe.“

Vom alten Boachlipp
„Sauf iech aa gääre Schnabs unn
Kümmel; iech kumm doch in de
Hiemel.“

Der Hoase Franz am Tor vom
„Kaffee Vieredt" zu den Gaffern:
„Iech binn hinn. Säht närr jetz ihr zu,
wie dr rej kummt'".

Spruch über den Nüchderle:
Dr Nüchderle laaft ess Berchle nuff
und dutt koa(n) Hüsterle.

Eine Frau aus der dunkelsten Dörgei
rief, als ihr die Zemmede nicht
geraten wollten, zuletzt verzweifelt
aus:
„Jetzt sch ... i nej unn moach Klöuss
drauss."

Dr Hoase Franz, stockhagelvoll,
an der Sternwirtsecke:
„Die Leud redde immer bloos vonn
mejm Saufe. Vonn mejm Dorschd
oawwer, doo redd koa(n) Mensch."

Ein satirischer Monolog über Geld, Bauch, Renommee, Theater und den fromm-bürgerlichen Schein.

Gääld
hoab iech gnuuch.
Mej Gschäft laaft guud.
Wi wouhl däss douch mejm
steedich wachsend Bäuchle duut!
Gens
unn
Ende,
Schnabs, Ligöör
unn
Wej
gäb iech mejm Gaul oamm liebste ej.
In
Theader,
Obber
Obberedde?
No jaa!
Zum Renommee
Iech hie unn do hald aa mool geh.
Unn
in die Käärch? - - -:-
Die Frooch iss mehr als üwwerzwerch. - - -
Doo renn iech selbstverständli fleißich nej.
Möucht oawwer aa
oann erster Stell
im Hiemel drouwe sej.

Eine herrliche Dorfgeschichte über Vogelscheuche, falschen Alarm, Amtspersonen und den armen Kasber.

Dr Stoange Kasber unn dr Quätschichschorsch senn ämool zusoamme
nuff dr Hoammberch goange.
Wie di zwaa sou gonz loangsoam uun gemächli zu demm grosse Kärscheboam
hiekumme, schreit uff oa(n)mool dr Quätschichschorsch:
„Kasber, doo guck hie, doo ouwe uff'm Kärscheboam hengt oaner.“
Zu Dood erschrogge glotzt dr Kasber hie:
„Wergli, mejner Seel, duu host räächt, doo ouwe hengt oaner.“
Uno scho dreht sich dr Kasber üm unn rennt sou schnell'r koann in di
Stoadt zerück, sschnurstroacks uff die Bolizei:
„Uff'm Hoammberch hot sich oaner uffkengt!"
Koum koann dr Kasber sej Sach vorbringe, sou muss'r schnaufe.
Unn scho kümmt Lääwe in di Buude.
„Um Goddes Wille, wäär werd's denn sej? .Es Gricht muss bei.
Schnell, ä Fuhrwerk for die hohe Herrn!“
Ess hot nid long gedauert . . unn scho. rattert ä Gäulsfuhrwerk inäme
Sautempo di Stoadt nunner, üwwer di Dauwerbrücke unn di alde Stroasse
naus. Dr Kasber oawwer sitzt vorne druff unn fühlt sich groad wi änn
Held.
Vonn weidem sieht merr'n scho, denn arme Deufel. Im Wiend boambelt'r
hie unn her. Unn dr Kasbcr zeicht druff.
Ess hohe Gricht oawwer moacht gonz ernsti Miene. Dr Härr Oamtsrichter
butzt scho sej Brille. Dr Schreiwer sücht gonz uffgrejcht unn durchenanner
in sejne Dasche nooch'm Bleistift, unn dr Bolizeidiener dutt sich
alli Gebott bekreuziche.
Jetzt senn si beinooh dort. Alles guckt nooch ouwe:
„Wahrhafti, wahrhafti Kasber, duu host räächt, doo ouwe…“
„Wass? Mensch! Sind sie von Sinnen? Ich sperre Sie ein. Das ist doch eine
Strohpuppe, eine Vogelscheuche…“
Armer Kasber … Er iss wergli ejgspärrt worde. Unn däss woar aa no guud
sou. Sunst wäär er glüncht worde.
Dr Quätscbichschorsch oawwer hinner scinerer Hecke hot sich doomools
beinoh zu dood glacht…

Eine Kirchen- und Marktszene, in der Predigt, Schweinemarkt und Müdigkeit auf sehr menschliche Weise zusammenfallen.

Dr Pfarrer preddicht uff dr Koanzel
vomm liewe Godd
unn
woass däss iss änn seelche Dood.
Währenddemm
dööst schlööfrich vor sich hie(n) dr Froanzel:
Schläächt
iss derzaad ess Angeboot vonn jungi Säuli
uff'm Markt.
Unn?
Zwanzich Pfenni for oa(n) Aale?
Iss gonz gwiess orc:h wennich,
wemmer denkt,
dass aa di Milich iss mehr als billich.
Wie söll oaner doo bestehne?...
No, No! ...
Di Käärch scho aus?...
Unn
niemes mehr im Goddeshaus?...
Jösses, jösses…!
Sou ä Schann?
Schlimmer no,
zu spööt iss ess aa no forr di Foohn.

Ein Dialoggedicht zwischen Türmen, Glocken und Stadtbild, voll Heimatstolz und augenzwinkernder Architekturpoesie.

Du liewer, alder Dörnersduure,
Liewes, aldes, graues Haus,
Gug doct nid sou böös häud rüüwer.
Zu, wi sieht'n däss scho aus?
Duure, Duure, moach koa(n) Sache,
Dummer, liewer Kerle du!
Geh, wäär wärd denn sou ä Gsiechd aa moache,
Dust groad wie änn kloaner Buu.
Oh dummer Kerle, liewer gudder Dörnersduure, stoulzer du.
Wärrst merr doch nid böös goar sej,
Weil iech, dr Käärcheduure, grösser binn als du?
Mejner Treu, Douhleduure, sou woass Dumms, eieiei!
Iech glaab ball, däss bringt diech sou aus dejnrer Ruh?
Dörnersduure, Käärcheduure,
Mir köörn zoamm, soulong merr stehn.
Dunn von mir di Glogge läude,
Bist duu schönner oozusähn.
Dörners- Käärche- Dörnersduure,
Gloggeläude,
Uhreschloach,
Wädderhoahne,
Wädderfohne,
Buwegsoong unn Douhlegschraa
Durch Joohr unn Doach.
Rings um uns die vieli Häusli
Unn di Mensche unn di Dier,
Höhberch, Stoammbcrch,
Spraat unn Hoammberch,
Alles, alles dreht sich blouss nooch dir unn mir,
Um
Durm unn Käärch.

Jürgen Wohlfarth

Der bislang vorliegende Wohlfarth-Text verbindet Dorfphilosophie, Sprachwitz und eine fast gelehrte Selbstbefragung des Büschemers. Auch hier bleibt immer nur ein Text gleichzeitig geöffnet.

Texte 1

Eine lange satirische Selbstvermessung des Büschemers zwischen Dorfphilosophie, Sprachwitz und Lokalstolz.

Sou oani wissnschafdliche Abhandlung üwwer den Büschemer, üwwer sej Wese, üwwer sejn Garagter, sejn Seinsbegriff vermißt mr, wünscht mr dringendst zou hoabe, zou lese. Wozou schiggt denn Büscheme sej Söhn unn Döchter uffs Gymnasium. Wech zum Studiere? Doo muß doch aa endli emool woas zurückkumme. Mr findet oafoach nix drvoor. Von dene Frooche unn Antwoorde uff die Büschemer Äsdedigg, des Sejns des Büschemers, des Büschemerischens. Des Büschemers an sich. Des Büschemers als solchm. Des Büschemerischen als solches. Mr woass zwaar, dass-r sich hervorhewt. Mr wüßte awwer scho gern gnauer, warüm unn wie. Unn woraus. Wir verloange Auskunfd üwwer den Büschemer an sich. Üwwer den Büschemer als solchen. Wissnschafdliiche Auskunfd. Doo studiere se Volgsgunnde, Sozjologi. Unn so a Zeuch. Hoawe als wissnschafdliiche Medode Struggduraliismus. Unn so a Zeuch. Awwer üwwer den gsellschaafdliiche Roang des Büschemers wisse mr oafoach immer noo fiel zuu wenich. Weil nix von dene zrückkummt. Wir braache Glassifizierungje. Bestimmunge des Büschemerischen. Eindeutiche. Goanz kloare. Strengt euch oafoach amool mr aa, ir studierte Vreckling, ir Vrecker, vreckdi. Mr hoawwe nuu lang gnuch druff gwarded. Das woas kummt. Das woas von euch zrückkummt. Ir Glassifizierungsverweicherer des Büschemerischen als solchen. Mr wolle awwer nuu Bscheid hoabe. Bscheid wisse. Üwwer unns Büschemer als solche. Üwwer unns Büschemer an sich. Für sich gnumme koann des doch goar net sou schwierich sei. Oafoach e bißle mr oastrenge. Ir Studentli. Ir vreckdi.

Sou. Ir Studentli, vreckdi. Nuu hoawwe mr awwer loong gnuch uff eure gscheide Diblomärbd, Dokterärbd gwarded. Kumme iss nix. Wäärglich nix. Dös koa net sey. Sapperlott. Woas due eichentlich eure Professore? Ja, dunn di denn nix? Des iss doch goanz offensichtli woass mr in Büscheme braache: Öä Abhandluung üwwer den Büschemer als solche. Des koa doach koa Froach sej, dass mr des braache. Sou früh als mögli. Öä schööns Voorwoard. Öä sauweri Gliiederunng. A gnaue Sprooch. Guudi Aargumende. Alsou nix Besonneres für Studierti. Für Studentli. Awwer warüm kriicht ir des net hie? Seideweis könnd mr üwwer den Büschemer als solchen schreiwe. Mr müssde nuur sej Wesen an sich erfasse unn beschreiwe. Mit viil Eichenschaftswöörder. Werbe. Füür sowoas sinn doach die Universidäden doach doo! Dass die Studentli uff souwoas kumme. Änn kloane Triitt voum Professor nuur. Inn euer Hinnern. Unn schoo wüürde des aa laafe. Alsou moacht woas, ir Akademigger, ir vreckdi. Gebt euri Studentli änn Bümper, wenn se aus Büscheme sinn. Unn noa oanen. Liewwer oanen mr als oan zwenich. Unn loaßt si noachdengge. Unn voor oallem schreiwe. Schreiwe. Schreiwe. Üwwer Büscheme. Üwwer den Büschemer als solchen. Üwwer Büscheme an sich. Unn nix anneres. Des nennd mr häud Kernkoambedänz. Ir Akademigger, ir vreckdi.

Ir Studentli, ir vreckdi. Deengt amool bsonners nooach, woas den Büschemer ausmoacht. Woas in sejne Sprüüch drinn steckt. Dehn bsunnnere Büschemer Geisd doo drinne. In denne Sätz. Unn aa woass doahinner steckt. Woas iss dess Besunnere am Büschemer? Woass moacht den Büschemer als solchen aus? Foangt miid den oafache Sprüuch unn Sätz aa. Duud die Filosofieh dahinner expliziiere. Unn däude. Deengt a droo, dass ess ä Owwer- unn Unnerstoadt giibt. Unn aa ä Voorschd. Unn dass sich die Unnerstoadt in ä komblizierdes Gewärchel uffdeild. Dörgei, Wallachei. Mongolei. Bolagei. Kloa-Venedich. Des sinn Welde für sich. Unn doamid aa Deudungswelde. Guckt aa uff di Ärbd di dr Büschemer duud. Unn aa uff die wunnerbaare Gmarkung, inn der Büscheme leit. Deengt aa droo, wifiel Stoa mr in unnere Gmoa uff de Ägger hoawwe. Unn wi steil di Buckel sinn. Unn wi schöö mr di fiele Buckel nunner gugge koa. Inns Dauwerdoal. Uff die annere Buckel. Unn beachded die bsunnere Büschemer Äsdedigg. Di Stoammberchskabelle. Di Biller von Grünewald. A wenn si schoo wech sinn. Ous der Stoadt nausgschafft. Des Bögner-Palais aom Marktploatz. Des sinn äsdedische Wunner. Weltwunner in unnerer Kloastoadt. Di es zu begreife geit. Wenn mr dem Büschemer als solchem versdehe will. Ir Studentli, ir vreckdi. Duud endli woas.

Voor allem die Sprüüch! Die gewe alles zuu deude, woas zu deude am Büschemer als solchem iss. Awwer denggt a ann die Henger, di zuur Fastnaacht in der Unnerstoadt rumschliiche sinn. Kloane Kinner verschreggt hoawe. Nämmt euch oanzelne Wöardr wie Deiehenker voor. Di mr in Büscheme de Kinner ann de Dötz gschmisse hoatt. Lafft aamool duurchs Daawerdle nuff uff di Höh. Hoaggt euch uff a Stoarassel uffm Edelberch. Dabbt aamool nej in de Drääg. Damit ir sät, wi besunners dr Büschemer Drääg sej koa. Damit ir vrstehd, wi änn Büschemer soache koa, dass Schöö Drääg daageeche iss. Diese bsunnere Büschemer Dialeggdig müssdr verstehe wennr den Büschemer als solchen in seinem Due und Sejn verstehe wolld. Inn dmm oane Satz "Schöö iss Drääg degeeche" iss oalles driin. Die goanze Weldgschiicht. Houlds änndli rauss woas doo driin iss. Alsou, Büschemer Studentli, vreckdi. Fanggt endli oa zu dispudiere. Fanggt ann zu deenge. Noachzudeenge. Dief noachzudeenge. Goanz dief noachzudeenge. Und schreiwt alles uff, woas euch eigfalle ist. Bringt Ordning in euer Uffgeschriebenes nej. Sauweri Gedangge üwwer den Büschemer als solchem. Fein säuwwerlich niiderglejcht in euri Diblomärbd. Dokterärbd. Unn bloos koa lumbichs Nejgedu vunn Wiggibedia-Arrdigel unn koa Rümmgeguuchel. Dann wärde mr schoo weiddrsähe ob ir ds Wese des Büschemer als solchem erfasst hoabt. Unn eur Gschribbsel a woas daucht. Ir Studentli. Ir vreckdi.

Denggt aa noach üwwer den öwerschte Büschemer Aousruff "Häuser häär! Häuser häär!" Denn oan Büschemer im Duusel gruuffe hot. Aols-er di Glostergaas noa im Suff gloffe is. Di Henn ann de Häuswäännd entlang. Als Stütze unn Hoalt. Unn aom Mühlgrowwe nejgfalle iss. In di Boach. Weil doo koa Häuser mr sinn. Koa Häuswäänd mr zum Stütze. Unn dann im nasse unn ernüchdernde Zuustoand z'ruufe: "Häuser häär! Häuser häär!" Mr beachde die schwiiriche exiisdensjalischdische Bosition des in de Mühlgroawe Nejgfallene. Die voorheergegaonge Drungenheid. Unn nuun Sätz, die die eurobäische Dengweise des Raumes uffhewe. Den Raum als bewechliche begreiffe. Oan Funggeschloach in die eurobäische Filosofie nej ghoawe. Den Raum als flexsiwlen erfasse. Unn des in Büscheme. Nah dr Dörgei. Doo soach oaner nuur, dess sej bloss die Büschemer Unnerwäld der Ungebildede. So uff zwoa Worde gebroacht müssde alle Weisheid sej. Awwer des geits nuur in Büscheme. Doohin müssd ir widder kumme, ir vreckdi Studentli. Kuurz unn gnab unn alles drin. Wennr des verstoanne hoabt, dann wissd a wi dr Büschemer als solcher zu versteehne iss. Unn nu los, ir vreckdi Studentli. Schreiwt euer Sermoon dzuu.

Awwer, ir vreckdi Studentli. Vergesst niid die Büschemer Vergoangenheid. Di wejnreiche. Doo müsstr in wejnseliche Zeide zrückreise, um ds zuu verstehne. Aols Büscheme nid Broviinz woar, sunnern Middelbunkt. Oals ä wejnreiche Stoadt. In jedem Büschemer steggt newwe oan kloabürcherliche Ebikureer oan hoamlicher Hegelianer, der drootz seines alltächlichen Schimpfens uuf Alles unn Jedes, alles Wörgliche voor vernüünftich hiilt. Aolsou mr oals puure Realiste siin, di im blangge Daosej ir Sej haowwe. Vonn aldersher woare di Büschemer säuerliche Halbblatoniger gwese, dere Gschmackssinn noach oaner ni erreichde, nie erreichboare Wejnqualidäd als Maßstab dr Messbargeit dr dadsächliche Ernde oriendiirt woar. Di Büschemer hoffde immr uff mr Öchslegroad oals möglii woar. Aa dess mergg euch, ir vreckdi Studentli, wennr drüüwwer noachdenggt.

Guggt mr in oalde Aggde nej, siehd mr, daoss dr Büschemer ned nuur inn aolljäärlicher Widderkeer des Ewichgleiche gfange woar. Wi mr in immr goanz gonserwatief beschreiwt. Eer hot woas Uudobisches ghobt. Wenn-er oan Grensstoa hoamli versetzt hoat, dann liwwer ä boar Medder mr als blos oan hoalbe. A wenn mr damoals no inn Fuss odr inn Rude gmesse hot. Aa dess iss zu bedenge, wenn-er droo geht, dehn Büschemer als solchm abbzubilde. Ir Studentli, ir vreckdi. Wenn-i nuu droo dengg, wifiel vonn eurer Ärbd i nuun schoo gmoacht hob, woas i wärgli net waroum ir ned anfoangt miit eure agadehmische Ausarbeiduunge. I hob schoo fasd aolles verradde woas ir bloas niderschreiwe müßt. Unn nu faangt oo. Ir vreckdi Studendli. Unn wenn-r nid liefert, die agadehmische Ärbd, dann seid ir wärglich nur vreckdi Studendli. Wi ir in Büscheme immr gheiße hoabt. Unn seid a nix mr. Höchstens vreckdi Vreckling.

Unn denggt a droo euch di Büschemer Noame vorzunemme, wenn-dr den Büschemer als solchem annalisierd. Noame wie Aule, Dölfer, Fitzer, Simmele, Ogger, Maalche, Säbber, Döid, Dööner, Naaz, Huggel, Klouwe, Ströhle, Knäbber, Woak-Woak, Dörg, Küffle. Wunnerboare Voornoame, Sbidznoame. Doo koann mr nuur uff eure Deutungshoheid hoffe, ir Studentli, ir vreckdi. Dass-dr doo a woas Gscheides rausbrängt. Dii edymologische Herkunnfd deude könnd. Unn a wissd warüm die Büschemer soo ghaase hoawwe. Unn denggt a droo die Büschemer Fluornoame zu süüsdemadisiere. Unn zu loggalisiere. Unn zu deude. Fluornoame wie Vertelisspitze, Aorschkerwe, Daawerdle, Mentele, Schleicher, Schinnersklinge, Gassroa. Oft woas mr schoa goar nimmer richtich, wo di gnau glieche hoawwe. Unn warümm di so ghaase hoawe. Iech hoab schoo druff higwiese, dass-dr aa die Schännwörd beachde solld, denn bejm Schänne iss-dr Büschemer als solcher midde drinn: Deiehenker, Schlabbedengler, Kröidebuwe, Grinnbatz, Gimpel, Dreckbatz, Brotzler, Damian, Knerps, Lakel, Knieböhrer, Schluuri, Lötfeiche, Krutzefixler, Dabes, Häfelesgugger, Säuriweliskoupf, Bananebiecher, Hoambäff, Drogser, Dzwugel, Housebümber, Forzknoude, Nigsdööcher, Dabscheg, Neusler, Lurer, Raffel, Bedsecher, Schienoos, Orschel, Säunigel, Schlapp, Kneudel, Dsornniggel, Sbrödser, Hoamdügger, Dindekleckser, Bücherwöörm, Griflsbidser, Kafruusch, Lumbekoor, Gschmas, Gelichder, Giggl, Hannööch, Dambes. Doo hoabt a schööne Uffgaab, ir Studendli, ir vreckdi. Moacht endli woas draus. Stoff hoabt-r gnuuch.

Nämmt euch ruuhich aa soa oanfache Sädz wi "Diech kriech iech noch! Wardd närr!" voor. Aa hiir widder is öa udobisches Momend driin. Aa wenn realischdisch aggzebdierd wiird, zunächsd nit zugreiffe zu könne, geed dr Bligg in di Zugunfd, uff a Spöaderes. Mr sied sich zwoomoal im Läwe. Bsunners in Büscheme. Unn wenn's uffm Margtplads iss. Dann kriech mr denn annere aom Wiggel. Fiel unn ofd z'hööre iss dr Sadz "Doo lachd doch di goanz G'moa unns aus." Hier sied mr denn Büschemer als solchm in seinr Vergesellschafdung in die G'moa. Jedder kennt jedden in Büscheme. Es wäärd üwwer oanen gsproche. Besunners wenn-r woas dud woas denn aonnere nid gfilld. Mr hot sei Dun und Dengge uff die G'moa ausz'richde. Öa nahezou duggmäuserische Äängst unn Hoaldung findet mr beim Büschemer als solchm im vunn seiner Ard hr wunneboare Sadz "Iech soch nid sou unn soach nid sou. Doann hoabb-iech nid sou oadder sou gsoachd, unn s'konn spööder koaner soache, iech hätt sou gsoached odder goar sou". Hiir zeiggd sich dr Büschemer inn seinnr Indiwidualidäd beengd, eyngeschränggd. Er gedraud siich in viele Siduatione nid ous seinr Haud raus. Gedraud sich nid sey Moanung zu saoche. Stoadlufft moacht zwoar frei, awwer nid immer in Büscheme. Denggt doo droo bei eurer Betrachdung des goanze büschemer Kosmoses. Ihr Studentli, ir vreckdi. Der koa a aamool goanz kloa sejn.

Dageche endfalded sich dr Büscheme als solcher besunners im äsdedische Dengge. Des is bisher fiel zu wenich beachded und verstanne worde. Dr Büschemer als solcher koa Sädz loslosse, die eine ungeheurliche Gomblexidäd in sich troache. Denn eher änge büschemer Horizond weid üwwerschreide. Awwer zou selde hörd mr änn Sadz wie "Schöö iss Drääg degeeche, oawwer schönner wäär's, wenn's no schönner wäär, wenn's wäär sou-wi-sou-scho sou-orch schöö". Die Büscheme Äsdedigg hot hiir noach oani Verwurzelung im Ärdverbunnene. Erhewt sich awwer uffs Wunnerbaarste aus dieser heraus in Betrachdungge zur Erhabenheid des Schöne. Des noch viil Schönnere. Sou ir Studentli, ir vreckdi. Jetzt hob ieh schoa fast euri Ärbd goanz alloo gmoochd den Büschemer als solchen in seine Fassedde uffzuzeige unn zu deude. Jetzt awwer seid ir droo. Ieh end hiir mid mej Hinnweiss. Fangt endli oa dn Disgors üwwer den Büschemer als solchen, dud disgerire, disputiere. Koa Gebeber, koa Gegags. Ann die Ärbd, ir Studentli unn kummt ärsst widder, wnn-r den Büschemer als solchem in aller Wissenschafdliikeid beschriwwe hoabt. Awwer kummt baold. Denn wir wardde druff. Ir Studentli, ir vreckdi.